सावधगिरी बाळगा..! नागरिकांनी कोणत्याही अनोळखी लोन किंवा ट्रेडिंग ॲपवर विश्वास ठेवू नये..

उद्रेक न्युज वृत्त :-अल्पावधीत ट्रेडिंगच्या माध्यमातून लखपती करण्याचे तसेच तात्काळ कर्ज देण्याचे आमिष दाखवून अनधिकृत डिजिटल लेंडिंग ॲप्स आणि संशयास्पद कंपन्यांकडून नागरिकांची आर्थिक फसवणूक केली जात आहे.या प्रकारात मध्यमवर्गीय नागरिक, सेवानिवृत्त व्यक्ती,वयोवृद्ध आणि विद्यार्थी मोठ्या प्रमाणात बळी पडत आहेत.त्यामुळे,नागरिकांनी कोणत्याही अनोळखी लोन किंवा ट्रेडिंग ॲपवर विश्वास ठेवू नये,असे आवाहन सायबर गुन्हे शाखेच्या वतीने करण्यात आले आहे.अनधिकृत लोन ॲपच्या माध्यमातून कमी व्याजदरात तात्काळ कर्ज देण्याचे आमिष दाखविले जाते.कर्ज प्रक्रियेच्या नावाखाली नागरिकांकडून वैयक्तिक माहिती,बँक खात्याचे तपशील,मोबाईलमधील संपर्क क्रमांक आणि अन्य संवेदनशील माहिती घेतली जाते.त्यानंतर या माहितीचा गैरवापर करून आर्थिक फसवणूक केली जाण्याची शक्यता असते.तसेच ट्रेडिंग ॲप्सच्या माध्यमातून कमी कालावधीत मोठा नफा मिळवून देण्याचे प्रलोभन दाखवून पैसे उकळले जातात.