महिला पोलिस कर्मचाऱ्याच्या कारचा भीषण अपघात; पोलिस कर्मचारीचा मृत्यू..

चंद्रपूर :-जिल्ह्याच्या चंद्रपूर-मूल मार्गावरील वलनी- बोर्डा वळण मार्गावर आज,सोमवार १७ ऑगस्ट रोजी सकाळच्या सुमारास झालेल्या भीषण कार अपघातात एका महिला पोलिस कर्मचारीचा जागीच मृत्यू झाला. विशाखा बन्सोड असे अपघातात मृत पावलेल्या पोलीस कर्मचारीचे नाव असून त्या नागभीड तालुक्यातील तळोधी-बाळापुर पोलीस ठाण्यात नुकत्याच रुजू झाल्या होत्या.यापूर्वी त्या सावली पोलीस ठाण्यात कार्यरत होत्या.विशाखा बन्सोड या आज सोमवारच्या सकाळी आपल्या स्विफ्ट कारने जिल्हा पोलीस मुख्यालयात असलेल्या उजळणी कोर्सच्या प्रशिक्षणासाठी निघाल्या होत्या.दरम्यान,चंद्रपूर-मूल मार्गावर वलनी-बोर्डा नजीक वळण घेत असतांना त्यांच्या कारला समोरून येणाऱ्या ट्रकची जोरदार धडक झाली.धडक इतकी भीषण होती की,कारचा अक्षरशः चुराडा होऊन झालेल्या भीषण अपघातात विशाखा बन्सोड यांचा जागीच मृत्यू झाला. अपघाताची माहिती मिळताच पोलीस पथक घटनास्थळी दाखल झाले व पंचनामा करून पुढील तपास सुरू केला आहे.