मादी बिबट्याच्या मृत्यूने वनविभागात खळबळ..!

सिंदेवाही(चंद्रपूर):-सिंदेवाही वनपरिक्षेत्रांतर्गत येणाऱ्या नवरगाव नियत क्षेत्रातील कक्ष क्रमांक-२३४ राखीव वनामध्ये गुरुवार,१३ ऑगस्ट रोजी एक मादी बिबट मृतावस्थेत आढळून आल्याने वन विभागात एकच खळबळ उडाली.प्राथमिक अंदाजानुसार,या मादी बिबट्याचा मृत्यू दोन वन्यप्राण्यांच्या झुंजीत झाल्याचे सांगण्यात आले.या बाबतची माहिती होताच सिंदेवाहीच्या वनपरिक्षेत्र अधिकारी अंजली सायंकार-बोरावार वनकर्मचाऱ्यांसह घटनास्थळी दाखल झाल्या. घटनास्थळावर अंदाजे चार वर्षे वयाच्या बिबट्या (मादी) मृतावस्थेत असल्याचे दिसून आले.त्यानंतर वन परिक्षेत्र अधिकाऱ्यांनी घटनेची माहिती भ्रमणध्वनीव्दारे वरिष्ठ अधिकाऱ्यांना दिली.माहिती मिळताच घटनास्थळावर ब्रम्हपुरी वनविभागचे उपवनसंरक्षक डॉ.कुमारस्वामी एस.आर.,सहाय्यक वनसंरक्षक(प्रादेशिक व वन्यजीव) अरविंद जे.,चंद्रपूरचे मानद वन्यजीव रक्षक अमोद गौरकार,तरुण पर्यावरणवादी मंडळ शंकरपूरचे शितलकुमार भांडारकर,स्वॉब नेचर फाऊंडेशनचे जिवेश सयाम, बायोलॉजीस्ट राकेश अहुजा आदी उपस्थित झाले.त्यांच्या समक्ष घटनास्थळाचा पंचनामा करण्यात आला.शवविच्छेदनादरम्यान मादी बिबट्याच्या पाठीवर तसेच समोरील उजव्या पायावर गंभीर जखमा आढळून आल्या.या जखमा इतर  वन्यप्राण्यासोबत झालेल्या संघर्षातून झाल्याचा प्राथमिक अंदाज आहे.व्हिसेरा तपासणीसाठी पाठवण्यात आला असून पुढील तपास सुरू आहे.