रेतीच्या भरधाव टिप्परने दुचाकीस्वाराला चिरडले..

भंडारा :-दुचाकीत इंधन भरून शहराच्या धावत्या दिशेने मुख्यमार्गाला लागलेल्या दुचाकीस्वाराला रेतीच्या भरधाव टिप्परने चिरडले असल्याची घटना काल,मंगळवारी १५ ऑक्टोंबरला सकाळच्या सुमारास तुमसर शहरातील कारेमोरे पेट्रोल पंपसमोर घडली. मेंदूला जबर मार लागल्याने दुचाकीस्वार जागीच ठार झाला.प्यारेलाल कुमावत वय ३२ वर्षे,रा.शिक्कार, राजस्थान असे अपघातातील मृताचे नाव आहे.

अपघात घडताच घटनास्थळी एकच गर्दी जमली. मॉर्निंग वॉकला जाणारे,सकाळच्या शिकवणी वर्गाचा प्रवास करणारे विद्यार्थी सदर अपघाताचे प्रत्यक्षदर्शी ठरले.मृत प्यारेलाल कुमावत एमएच ३६/एम ६९८६ क्रमांकाच्या दुचाकीने इंधन भरून भंडाराच्या दिशेने जाण्याकरिता जेमतेम मुख्यमार्गाला लागला होता. त्याच दिशेने निघालेल्या एम एच ३७ / एफ ३२६५ क्रमांकाच्या टिप्परने मृताच्या गाडीला मागेहून जबर धडक दिली.त्यात दुचाकीचा अक्षरशः चुराडा झाला. गाडीच्या खाली येऊन प्यारेलाल जागीच दगावला. घटना घडताच टिप्पर चालकाने घटना स्थळावरून पळ काढला.घटनेची माहिती तुमसर पोलिसांना प्राप्त होताच त्यांनी घटनास्थळ गाठून पंचनामा करून मृतदेह उत्तरीय तपासणी करीता उपजिल्हा शासकीय रुग्णालयात रवाना केले.जड वाहन व चालकाला ताब्यात घेऊन तुमसर पोलिस पुढील तपास करीत आहेत.