मोबाईलवरील ‘एसीके फाइल’ डाउनलोड करताच उडाले ९ लाख ३६ हजार..

चंद्रपूर :-सायबर भामटे नवनवीन शक्कल लढवून अनेकांच्या बँक खात्यावर डल्ला मारू लागले आहेत. सर्वत्र बँक तसेच बातम्या प्रसारित करून सावधानतेचा इशारा देऊनही काहीजण सायबर चोट्यांच्या जाळ्यात अडकले जात आहेत.असाच एक प्रकार चंद्रपूर जिल्ह्याच्या भद्रावती शहरात उघडकीस आला आहे.भद्रावती शहरातील एका मोबाइल व्यावसायिकाच्या खात्यातून सायबर चोरट्यांनी तब्बल ९ लाख ३६ हजार ३६८ रुपये उडवले असल्याची घटना नुकतीच उघडकीस आली आहे.सतीश भिवगडे यांचे भद्रावती शहरात मोबाइलचे दुकान आहे.त्यांनी एचडीएफसी बँकेत गोल्ड लोनसाठी मागणी केली होती.त्यासाठी कागदपत्रे सादर केली. मात्र,बैंक कार्यवाहीसाठी विलंब झाल्याने ते घरी गेले.काही वेळेनंतर त्यांना एचडीएफसी बँकेचा लोगो असलेला मॅसेज आला.त्यात गोल्ड लोनसाठी मागणी केल्याचे नमूद होते.केवायसी केल्यानंतर मोबाइलवर एसीके फाइल डाउनलोड करण्यास सांगितले.त्यांनी ते करताच बँकेची संपूर्ण माहिती त्या व्यक्तीकडे पोहोचली.काही वेळातच त्यांच्या बँक खात्यातून ९ लाख ३६ हजार ३६८ रुपये गायब झाले.डेबिट चा मॅसेज येताच सतिश यांना धक्काच पोहचला.लगेच त्यांनी पोलिसांत धाव घेतली,तोपर्यंत फार उशीर झाला होता.