अपघातात शिक्षकाचा दुर्दैवी मृत्यू..!

वैभव खोब्रागडे हे घटनेच्या दिवशी म्हणजेच मंगळवार १ सप्टेंबर २०२६ रोजी ते आपल्या एमएच ३१ एक्यू २९८५ क्रमांकाच्या दुचाकीने वर्धा येथील कार्यक्रम आटोपून नागपूरच्या दिशेने परत येत होते.दरम्यान,रात्री १० वाजेच्या सुमारास सिडको कॉलनी मार्गावर टीएन ९३ जे २७९५ क्रमांकाचा ट्रक धोक्याची कोणतीही सूचना न देता रस्त्यात उभा करण्यात आला होता.मार्गावर अंधार असल्याने वैभव यांना उभ्या असलेल्या ट्रकचा अंदाज आला नाही.त्यामुळे त्यांची दुचाकी ट्रकच्या मागील भागावर जोरदार आदळली.या भीषण धडकेत ते गंभीर जखमी झाले.अपघातानंतर वैभव यांना नागपूर येथील एम्स रुग्णालयात दाखल करण्यात आले.मात्र,उपचार सुरू असतांनाच रात्रीच त्यांचा मृत्यू झाला.या प्रकरणी त्यांची आई चंदा शंकर खोब्रागडे यांच्या तक्रारीवरून बुटीबोरी पोलिसांनी निष्काळजीपणे ट्रक उभा करणाऱ्या चालकाविरुद्ध गुन्हा दाखल केला.शिक्षकाच्या दुर्दैवी मृत्यूने बुटीबोरी परिसर व त्यांच्या मूळ गावी हळहळ व्यक्त केली जात आहे.