वाघाच्या हल्ल्यात तरुणाचा मृत्यू..

चंद्रपूर :-ताडोबा-अंधारी व्याघ्र प्रकल्पाच्या बफर क्षेत्रातील मोहर्ली वनपरिक्षेत्रात वाघाच्या हल्ल्यात एका तरुणाचा मृत्यू झाल्याची घटना मोहर्ली वनपरिक्षेत्राच्या मोहर्ली बिटातील १५४ कक्ष क्रमांकात घडली.विजय मधुकर मेश्राम वय २६ वर्षे,रा.जुनोना,ता.जि.चंद्रपूर असे वाघाच्या हल्ल्यात मृत पावलेल्या तरुणाचे नाव आहे.ही घटना शनिवार २९ ऑगस्ट २०२६ रोजी दुपारच्या सुमारास घडली आणि आज सर्वत्र उघडकीस आली.

जुनोना येथील विजय मेश्राम शनिवारच्या सकाळी गाव नजीकच्या जंगल परिसरात गुरे चारण्यासाठी गेला होता. दरम्यान,दुपारी १ वाजेच्या सुमारास जंगली भागात दबा धरून बसलेल्या वाघाने अचानकपणे त्याच्यावर झडप घातली.यात विजयचा घटनास्थळीच मृत्यू झाला.घटनेची माहिती होताच गावकऱ्यांनी घटनास्थळी धाव घेत याबाबत वन विभागास कळवले.लागलीच मोहर्लीचे आरएफओ संतोष थिपे, दुर्गापूर पोलीस ठाण्याचे ठाणेदार शेगावकर व पथक,मानद वन्यजीव रक्षक मुकेश भांदककर आणि वन विभागाचे पथक घटनास्थळी दाखल झाले.घटनेचा पंचनामा करून मृतदेह शवविच्छेदनासाठी भद्रावती ग्रामीण रुग्णालयात पाठवला.दरम्यान,वन विभागाकडून मृतक तरुणाची आई निरंजना मधुकर मेश्राम यांना ५० हजार ५०० रुपयांची तात्काळ आर्थिक मदत सुपूर्द करण्यात आली.घटनेने परिसरात भीतीचे वातावरण पसरले असून हल्ल्यातील बळींची संख्या वाढतीवर आहे.