भाराभर समस्यांचा डोंगर उभा असताना १ कोटींचे एलईडी स्क्रीन.. – कंत्राटदारांनी सांगितलेले फसवे प्रयोग येणार अंगलट…

भंडारा :-शहरातील ४ प्रमुख चौकांत तब्बल १ कोटी रुपयांचे ४ एलईडी स्क्रीन लावण्यात आले आहेत. शहरातील रस्ते खड्डेमय झालेत.नागरिकांना पिण्याचे पाणी मिळत नाही.नगर परिषद शाळांना ईमारती नाहीत.शिक्षकांची पदे रिक्त आहेत.अशा एक नव्हे भाराभर समस्यांचा डोंगर उभा असताना या अनाठायी खर्चाची उधळपट्टी केली जात आहे.

जाहिरातीमधून महसूल वाढविण्यासाठी भंडारा नगरपालिकेने शहरात चार ठिकाणी एक कोटी रुपयांचे एलईडी स्क्रीन लावले आहेत.या जाहिरातीमधून तोट्यात असलेली पालिका नफ्यात येत असेल,तर आणखी चार चौकात एलईडी स्क्रीन लावा; अशा गमतीदार चर्चा आहेत.दरम्यान,एलईडी स्क्रीनसंदर्भात माहितीनुसार शास्त्री चौक,त्रिमूर्ती चौक, लायब्ररी चौक आणि राजीव गांधी चौक अशा चार ठिकाणी एलईडी स्क्रीन लावण्यात आले.

याचा बजेट ४ एलईडी स्क्रीनचा खर्च १ कोटी रुपयांचा आहे.हे ऐकून विश्वास न बसल्यामुळे पुन्हा एकदा विचारून खात्री करण्यात आली.

इतकी महागडी एलईडी मिळते तरी कुठे?👇

 एलईडी स्क्रीन ज्याठिकाणी लावण्यात आले, त्याठिकाणी पाच फूट लांबी,दोन फूट खोल खड्डा खोदून सिमेंट क्राँक्रीटचा आयाताकृती चबुतरा तयार करण्यात आला.त्या चबुतऱ्यावर २० फूट लोखंडी खांबावर एलईडी स्क्रीन लावण्यात आले.हे एलईडी स्क्रीन विजेवर चालणार आहे.त्याचठिकाणी सोलर पॅनेल दिले असते,तर विजेची बचतही झाली असती. परंतु तसे करण्यात आले नाही.सोलर पॅनेलचे वेगळे इस्टिमेट बनवून त्यातही मलिदा लाटण्याची योजना कंत्राटदार आणतील यात शंका नाही.शहरात लावलेल्या या चारही एलईडी स्क्रीनचा खर्च एवढा येत नसताना यासाठी १ कोटी खर्चाचे देयके कोणत्या कंपनीतून आणले जाते हा प्रश्न अनुत्तरीत आहे.

खरचं जाहिरातीतून महसूल मिळणार का? शास्त्री चौक,त्रिमूर्ती चौक,लायब्ररी चौक आणि राजीव गांधी चौक अशा चार ठिकाणी लावण्यात आलेल्या एलईडी स्क्रीनवर भंडाऱ्यातील व्यापारी जाहिराती देणार का? जाहिराती दिले तरी त्यातून अपेक्षित महसूल मिळणार का? हे एलईडी स्क्रीन लावण्यासाठी आलेला १ कोटी रुपयांचा खर्च पुढच्या पंचवार्षिकमध्ये निघाला तरी हा प्रयोग सार्थक झाला,असे म्हणता येईल.परंतु,भंडारा हे महानगर असल्याची जाणीव करून देणाऱ्या कंत्राटदारांनी सांगितलेले असे फसवे प्रयोग अंगलट येण्याची शक्यता अधिक असते.