नाल्याच्या काठावर शौचास बसलेला चिमुकला पडला नाल्यात.. – तीन वर्षीय चिमुकल्याचा मृत्यू; गावात हळहळ..

भंडारा :-जिल्ह्याच्या लाखांदूर तालुक्यात एक धक्कादायक घटना आज,रविवार २७ जुलै रोजी सकाळच्या सुमारास उघडकीस आली.एका तीन वर्षीय चिमुकल्याचा नाल्याजवळ शौच करतांना अचानकपणे पाण्याने तुडूंब भरलेल्या नाल्यात तोल जाऊन दुर्दर्वी मृत्यू झाल्याची घटना लाखांदूर तालुक्याच्या कुडेगाव येथे घडली.सुशांत ईश्वर उपरीकर वय ३ वर्षे रा.कुडेगाव,असे मृत पावलेल्या चिमुकल्याचे नाव आहे.

लाखांदूर तालुक्याच्या कुडेगाव येथील ईश्वर उपरीकर यांचे मांदेड कुडेगाव रस्त्यावर नाल्या शेजारी घर असून सकाळी सुशांतला शौचास लागल्याने त्याने आईला सांगितले.त्यानुसार मुलगा सुशांतला नाल्याच्या काठावर शौचास बसवून ती पाणी आणण्यासाठी गेली.नाल्याच्या काठाजवळ बसल्याने सुशांतचा तोल जाऊन तो पाण्यात पडला.नाला तुडुंब भरून असल्याने तो जवळपास २०० मीटर दूर अंतरावर वाहत गेला.यादरम्यान,आईने येऊन बघितले असता,त्या ठिकाणी मुलगा दिसून न आल्याने तिने आरडाओरड केली.आवाज ऐकून परिसरातील नागरिकांनी धाव घेतली आणि शोधमोहीम सुरू केली. तब्बल चार तासांच्या अथक प्रयत्नांनंतर मुलाचा नाल्यात मृतदेह आढळून आला.घटनेची माहिती मिळताच लाखांदूर पोलीस घटनास्थळी दाखल झाले.यानंतर मृतदेह शवविच्छेदनासाठी लाखांदूर ग्रामीण रुग्णालयात पाठविण्यात आला.यावेळी लाखांदूरचे तहसीलदार वैभव पवार तसेच लाखांदूर पोलीस ठाण्याचे ठाणेदार सचिन पवार सह महसूल विभागाचे कर्मचारी घटनास्थळी दाखल झाले.घटनेने संपूर्ण गावात शोककळा पसरली असून चिमुकल्याच्या मृत्यूने गावात हळहळ व्यक्त केली जात आहे.