ती’ आत्महत्या नसून हत्याच; दोषींवर मनुष्यवधाचा गुन्हा दाखल करा- आझाद समाज पार्टी -आरमोरी तालुक्यातील विष प्राशन प्रकरण…

आरमोरी(गडचिरोली):-मारहाणीमुळे तणावात गेलेल्या अल्पवयीन मुलीने विष प्राशन केल्याने  उपचारादरम्यान तिचा मृत्यू झाल्याची घटना शनिवारी ५ ऑक्टोंबरच्या सकाळी ६ वाजताच्या सुमारास उघडकीस आली. शिवानी फकीरदास कोवे वय १७ वर्षे,रा.कुकडी, ता.आरमोरी असे मृत मुलीचे नाव आहे.

विहीरगाव येथील चिकन सेंटर चालवत असलेल्या प्रशांत भोयर या दोन अपत्य असलेल्या व्यक्तीबरोबर शिवानीचे प्रेम प्रकरणाच्या संशयातून प्रशांतची पत्नी शिल्पा भोयर,आई कल्पना विश्वनाथ भोयर,वहिनी अरुणा प्रफुल भोयर यांनी गुरुवारी ३ ऑक्टोंबरला दुपारी २ वाजताच्या समारास शिवानीच्या घरी जाऊन भांडण केले.तिला खोलीत डांबून मारहाण केली. त्यामुळे ती नैराश्यात गेली आणि तिने विष प्राशन केले.प्रकरणामुळे शिवानीने बदनामीच्या भीतीपोटी आत्महत्येचे पाऊल उचलले.ही आत्महत्या नसून हत्याच आहे; त्यामुळे मारहाण करणाऱ्या दोषींवर मनुष्यवधाच्या गुन्ह्यासह ऍट्रॉसिटी अंतर्गत गुन्हा  दाखल करावा तसेच सदर प्रकरणाची सखोल चौकशी करून कुठल्याही राजकीय दबावात न येता युवतीच्या कुटुंबीयांना न्याय मिळवून देण्यात यावा; अशी मागणी गडचिरोलीसह आरमोरी आझाद समाज पार्टीच्या वतीने करण्यात आली.

आदिवासीच नव्हे तर जिल्ह्यातील कोणत्याही समाजाच्या मुलीवर अन्याय होत असेल तर आझाद समाज पार्टीच्या वतीने अन्याया विरोधात आवाज उठवून संघर्ष करणार,असे आझाद समाज पार्टी गडचिरोलीचे कार्याध्यक्ष विनोद मडावी यांनी सांगितले.यावेळी पक्षाचे गडचिरोली जिल्हाध्यक्ष राज बन्सोड,जिल्हा महासचिव पुरुषोत्तम रामटेके , आरमोरी विधानसभाध्यक्ष ऋषी सहारे,जिल्हा सचिव दिनेश बनकर,गडचिरोली विधानसभा प्रभारी धनराज दामले,आरमोरी तालूका कार्याध्यक्ष पुरुषोत्तम मैंद, युवा आघाडी प्रमुख शुभम पाटील,उपाध्यक्ष पियुष वाकडे,शहराध्यक्ष नितीन भोवते,मिडीया प्रभारी सतीश दुर्गमवार व पीडिताचे आई-वडील उपस्थित होते.