अपघातात तरणेबांड मुलाचा मृत्यू..!

भंडारा :-अपघात वा एखाद्याचा मृत्यू हा क्षणिक आहे. कोण,केव्हा सोडून जाईल,याचा नेम नाही.ईश्वराची किमया ही अलगच आहे; तो आपल्यावर कधीही येऊच देत नाही.कारण एखाद्याच्या मृत्युसाठी कुठले ना कुठले तरी कारण असतेच,त्यामुळे तू इतका निर्दयी कां?असे म्हणण्याचा प्रश्नच उरत नाही.त्यातच,एखाद्या तरणेबांड मुलाचा मृत्यू झाल्यास कुटुंबीयांची अवस्था कशी होत असते,हे ईश्वरालाच माहीत.अशीच काळीज धडधडायला लावणारी घटना भंडारा जिल्ह्याच्या कारधा पोलिस ठाण्याच्या हद्दीतील मुंबई-कोलकाता या राष्ट्रीय महामार्ग क्रमांक-५३ वरील धारगाव गावाजवळील मुख्य मार्गावर काल मंगळवारी सकाळच्या सुमारास घडली.मुख्य मार्गावर ना वळण ना समोरून येणारे कोणते वाहन, तरीही रस्त्याच्या एका बाजूला उभ्या असलेल्या ट्रकला मागून स्कूटीची जोरदार धडक झाल्याने स्कूटीवरील तरुणाचा जागीच मृत्यू झाला.संकेत सुखदेव सपाटे वय ३० वर्षे,हनुमान नगर,लाखनी,जि.भंडारा असे मृत तरूणाचे नाव असून तो भंडारा येथून त्याच्या गावी लाखनीला जात असतांनाच सदरचा अपघात घडला. एमएच ३६ एएम ४५०६ क्रमांकाच्या स्कूटीने संकेत हा भंडाराहून लाखनीला जाण्यासाठी निघाला असता भंडारा तालुक्याच्या धारगावजवळ जाताच तेथील मार्गावर रस्त्याच्या बाजूला सीजी ०४ एमबी ७६९६ क्रमांकाचा एक ट्रक उभा होता.ट्रक उभा असतांनाच संकेतने ट्रकच्या मागील बाजूस स्कूटी नेऊन आदळली. यात स्कूटीच्या नुकसानीसह डोक्याला जबर मार लागल्याने संकेतला तातडीने भंडारा जिल्हा सामान्य रुग्णालयात नेण्यात आले.मात्र,तपासणीअंती डॉक्टरांनी त्यास मृत घोषित केले.