डुंबरसात्या आणण्यासाठी जंगल परिसरात गेलेल्या इसमाचा वाघाच्या हल्ल्यात मृत्यू..

गडचिरोली :-गावालगतच्या जंगल परिसरात ‘डुंबरसात्या’ म्हणजेच मशरूम आणण्यासाठी गेलेल्या एका ४५ वर्षीय इसमाचा वाघाच्या हल्ल्यात मृत्यू झाल्याची घटना आज,गुरुवार २४ सप्टेंबर रोजी सकाळच्या सुमारास गडचिरोली तालुक्यातील वसा गावच्या जंगल परिसरात उघडकीस आल्याने परिसरात एकच खळबळ उडाली.बाळू विठ्ठल राऊत वय ४५ वर्षे, रा.वसा, ता.जि.गडचिरोली असे मृतकाचे नाव आहे.

माहितीनुसार,वसा येथील बाळू राऊत हे काल बुधवारी डुंबरसात्या आणण्यासाठी गाव नजीकच्या जंगल परिसरात गेले होते.बराच कालावधी लोटूनही ते घरी परतले नसल्याने कुटुंबीयांनी गावकऱ्यांसह शोधमोहीम राबवली.दरम्यान,मोबाईलवर संपर्क केला असता त्यांचा मोबाइल बंद दाखवत होता.मोबाइलचे लोकेशन शोधण्यासाठी सायबर सेलच्या माध्यमातून प्रयत्न करण्यात आले.मात्र मोबाइल बंद असल्याने लोकेशन कळू शकले नाही.त्यामुळे,गावकऱ्यांनी जंगल परिसरात शोधमोहीम सुरू ठेवली असता आज गुरुवारच्या सकाळी वसा गावालगतच्या जंगलात बाळू राऊत यांचा मृतदेह छिन्नविच्छिन्न अवस्थेत आढळून आला.परिसरात वाघाचा वावर असल्याने बाळू राऊत यांच्यावर वाघाने हल्ला केल्याचा प्राथमिक अंदाज व्यक्त करण्यात येत आहे. घटनेची माहिती मिळताच पोलिस आणि वनविभागाच्या अधिकाऱ्यांनी घटनास्थळी धाव घेतली.गडचिरोली पोलीस ठाण्याचे ठाणेदार विनोद चव्हाण,आरमोरी पोलीस ठाण्याचे ठाणेदार सचिन झणक यांच्यासह वनविभागाच्या अधिकाऱ्यांनी घटनास्थळाची पाहणी करून पुढील कार्यवाही सुरू केली.घटनेने परिसरात भीतीचे वातावरण निर्माण झाले आहे.