अंगणात खेळत असतांना भरधाव वाहनाची धडक; दीड वर्षीय चिमुकल्याचा जागीच मृत्यू..

भंडारा :-अंगणात खेळत असतांना अज्ञात चारचाकी वाहनाने एका दीड वर्षीय चिमुकल्यास जोरदार धडक दिल्याने चिमुकला दूरवर फेकला जाऊन जागीच गतप्राण झाला असल्याची घटना आज,रविवारी १६ मार्चला दुपारच्या सुमारास भंडारा जिल्ह्याच्या मोहाडी तालुक्यापासून ७ किलोमिटर अंतरावर असलेल्या साकारला येथे घडली.दुर्वांश डोये असे अज्ञात वाहनाच्या धडकेत मृत पावलेल्या चिमुकल्याचे नाव आहे.

मिळालेल्या माहितीनुसार,दुर्वांश याची आई काम करीत असतांना तिच्या बाजूलाच मुलगा खेळत होता.दुर्वाश हा अंगणात खेळत असतांना आंधळगावच्या दिशेने जात असलेल्या भरधाव चारचाकी वाहनाने दीड वर्षीय चिमुकल्याला जोरदार धडक दिली.यात दुर्वांश हा फुटबॉलसारखा दूरवर फेकला गेला.गाडीच्या धडकेत दूरवर फेकला गेल्याने चिमुकल्याचा जागीच मृत्यू झाला.दरम्यान अचानक घडलेल्या या घटनेने दुर्वाश याच्या आईला जबर धक्का बसला असून चिमुकल्याच्या मृत्यू झाल्याने आईने एकच टाहो फोडला.दरम्यान अपघातानंतर वाहन चालक घटनास्थळावरून पसार झाला.चिमुकल्याच्या वडिलांनी दिलेल्या फिर्यादीवरून गाडी चालकाविरुद्ध गुन्हा दाखल करण्यात आला आहे.प्रकरणी घटनेचा पुढील तपास आंधळगाव पोलीस करीत आहेत.