सामाजिक कार्यकर्ता आणि सहाय्यक पशुधन विकास अधिकारी यांच्यात भर चौकातच राडा…

चंद्रपूर :-रस्त्यावरील उभी दुचाकी काढण्याच्या वादात सहायक पशुधन अधिकारी डॉ.गजानन तेलकापल्लीवार आणि विधानसभा निवडणुकीची तयारी करणारे चंद्रपूरचे सामाजिक कार्यकर्ते भूषण फुसे यांच्यात भर चौकातच हाणामारी झाली.ही खळबळजनक घटना काल,शुक्रवारी सकाळच्या सुमारास शिवाजी चौकात घडली.याप्रकरणी दोघांनीही एकमेकांविरुद्ध पोलिसात तक्रार दाखल केली आहे.

चंद्रपुरातील सामाजिक कार्यकर्ते भूषण फुसे हे गोंडपिपरी शिवाजी चौकातील परिसरात सध्या भाड्याची खोली करून राहत आहेत.राजुरा विधानसभा क्षेत्रात निवडणूक लढविण्यासाठी त्यांची तयारी सुरू आहे.सहायक पशुधन अधिकारी डॉ. गजानन तेलकापल्लीवार हे देखील शिवाजी चौक परिसरात राहतात.शुक्रवारी डॉ.तेलकापल्लीवार हे छाया नेवारे यांच्या आजारी शेळीची तपासणी करण्यासाठी गेले होते.दरम्यान,त्यांनी आपली दुचाकी रस्त्याच्या बाजूला उभी केली.त्याच कालावधीत फुसे हे कारने बाहेर जाण्यास निघाले.मात्र,उभ्या दुचाकीमुळे त्यांना कार काढता आली नाही.हॉर्न वाजवूनही डॉ.तेलकापल्लीवार यांनी रस्त्यावर येण्यास उशीर केला.यावरून फुसे व त्यांच्या चालकाने डॉ. तेलकापल्लीवार यांना शिवीगाळ केली.त्यावर वाद वाढला व दोघांमध्ये जोरदार हाणामारी झाली. दरम्यान,नागरिक हा प्रकार पाहून संतापले. नागरिकांसोबत मिळून डॉ.तेलकापल्लीवार यांनीही फुसे यांच्या कारच्या काचा फोडल्या.याप्रकरणी दोघांनी पोलिसांत एकमेकांविरुद्ध तक्रार दाखल केली.