जप्त केलेला रेतीचा टिप्पर सोडण्यासाठी दोन हजारची लाच मागणाऱ्या सहाय्यक पोलिस उपनिरीक्षकावर गुन्हा दाखल…

भंडारा :-अपघातप्रकरणी पोलिस ठाण्यात जप्त केलेला रेतीचा टिप्पर सोडण्यासाठी दोन हजार रुपयांची लाच मागणाऱ्या सहाय्यक पोलिस उपनिरीक्षकाविरुद्ध भंडारा लाचलुचपत प्रतिबंधक विभागाने गुन्हा दाखल केला.सदरची कारवाई आज,   १९ सप्टेंबर रोजी वरठी पोलिस ठाण्यात करण्यात आली.राजेश सदाशिव बाभरे वय ५६ वर्षे असे गुन्हा दाखल झालेल्या सहाय्यक पोलिस उपनिरीक्षकाचे नाव आहे.

तक्रारदार हे नागपूर जिल्ह्यातील रहिवासी असून त्यांचा मालकीचा टिप्पर असून ते रेतीची वाहतूक करतात.त्यांच्या टिप्परचालकाविरुद्ध वरठी पोलिस ठाण्यात १ सप्टेंबर रोजी अपघाताप्रकरणी गुन्हा दाखल झाल्याने त्यांचा टिप्पर पोलिस ठाण्यात जप्त करुन ठेवण्यात आला होता.दरम्यान,टिप्पर सोडविण्यासाठी वरठी पोलिस ठाण्याचे कर्मचारी पाच हजार रुपयांची लाच मागत असल्याची तक्रार ६ सप्टेंबर रोजी भंडारा लाचलुचपत प्रतिबंधक विभागाकडे करण्यात आली होती.