अन् ‘त्याने’ संधी साधून चारचाकी वाहनच नेला पळवून… -कोंढाळा येथील वाहन चालकाच्या चहात टाकले होते गुंगीचे औषध…

देसाईगंज(गडचिरोली):-नागपूरला जायचे असल्याचे सांगून बोलेरो बुक करणाऱ्या अज्ञात इसमाने चक्क वाहन चालकाला चहामध्ये गुंगीचे औषध देऊन मोबाइल,रोख रक्कम तसेच बोलेरो वाहन घेऊन पोबारा केल्याची घटना नागपूर येथे उघडकीस आली आहे.या प्रकारामुळे आरमोरी येथील ट्रॅव्हल्स संचालकाला लाखोंचा गंडा घातला गेला आहे.

आरमोरी येथे अनिल सोमनकर यांच्या मालकीची साई टूर्स अँड ट्रॅव्हल्स नावाची एजन्सी असून,प्रवासासाठी ते भाड्याने वाहन देत असतात.३ ऑगस्टला एका अनोळखी इसमाने आरमोरी बसस्थानकावरून नागपूरला जाण्यासाठी चारचाकी वाहन भाड्याने हवी असल्याचे सांगितले.सोमनकर यांनी तात्काळ बोलेरो वाहनासह चालक अनिल मोहूर्ले रा.कोंढाळा, ता.देसाईगंज याला संबंधिताला नागपूरला पोहोचवून देण्यास सांगितले.नागपूरला पोहोचल्यानंतर अनोळखी व्यक्तीने एका हॉटेलसमोर वाहन थांबवित चालकाला गुंगीचे औषध टाकलेले चहा पिण्यासाठी दिले.काही वेळातच चालक अनिल मोहूर्ले बेशुद्ध पडल्याची संधी साधत अज्ञात इसमाने त्याला रस्त्याच्या कडेला ठेवून देत मोबाईल,रोख रक्कम तसेच चारचाकी वाहन घेऊन पोबारा केला. बेशुद्धावस्थेत असलेल्या चालकास तब्बल चार तासांनंतर रात्री जाग आली असता वाहन गायब असल्याचे निदर्शनास आले.यासंदर्भात प्रारंभी वाहन मालकाने नागपूर येथे तक्रार केली.मात्र,नागपूर पोलिसांनी तक्रार घेण्यास नकार दिल्यानंतर आरमोरी पोलिस ठाण्यात अज्ञात व्यक्तीविरोधात तक्रार दाखल करीत सदर प्रकरण नागपूर पोलिसांकडे वर्ग करण्यात आला.पोलिसांद्वारे अज्ञात व्यक्तीसह वाहनाचा शोध घेतला जात आहे.विशेष म्हणजे चार महिन्यांपूर्वी सोमनकर यांनी १३ लाख रुपये खर्च करून बोलेरो वाहन खरेदी केले होते.मात्र,अज्ञात भामट्याने वाहन पळविल्याने होत्याचे नव्हते झाले आहे.