अल्पवयीन मुलास अश्लील व्हिडिओ दाखवणाऱ्यास बेड्या..!

चंद्रपूर :-बऱ्याच कालावधीपासून एका अल्पवयीन मुलास अश्लील(पॉर्न)व्हिडिओ दाखवणाऱ्या ३० वर्षीय इसमास पालकांच्या तक्रारीवरून पोलिसांनी बेड्या ठोकल्या आहेत.प्रकरणी बाललैंगिक अत्याचार कायदा व पॉक्सो कायद्याच्या कलम १२ अंतर्गत गुन्हा दाखल करून अटक करण्यात आली व आरोपीस न्यायालयात हजर केले असता,न्यायालयाने त्यास बुधवारपर्यंत पोलिस कोठडी सुनावली आहे.सदरची घटना दुर्गापूर पोलिस ठाण्याच्या हद्दीत घडली असून अखिलेश विलास जाधव वय ३० वर्षे असे आरोपीचे नाव आहे.

आरोपी अखिलेश मागील एक वर्षापासून पिडीत अल्पवयीन मुलाला सतत अश्लील व्हिडिओ दाखवून त्याचे मानसिक संतुलन बिघडविण्याचे काम करायचा. आरोपी परिचयाचा असल्याने सदरची बाब कुटुंबियांच्या लक्षात आली नाही.मात्र,पीडित मुलाच्या घरचे दागिने चोरीला गेल्याने पालकांनी याबाबत मुलास विचारणा केली असता त्याने ते दागिने अखिलेशकडे दिल्याचे सांगितले व त्याबदल्यात तो अश्लील व्हिडिओ दाखवत असल्याचे पुढे आले.पालकांनी लगेच दुर्गापूर पोलिस ठाण्यात धाव घेत तक्रार नोंदवली.प्रकरणी दुर्गापूरचे पोलीस निरीक्षक संदीप काडे यांनी घटनेचे गांभीर्य लक्षात घेता गुन्हा दाखल करत आरोपीला अटक केली. प्रकरणाचा पुढील तपास पोलीस उपनिरीक्षक नरेंद्र उरकुडे करीत आहेत.