काय सांगता..? १४० रुपयांसाठी स्टॅम्प पेपर विक्रेता व मदतनीस एसीबीच्या जाळ्यात..!

चंद्रपूर :-दोन हजार रुपयांच्या स्टॅम्प पेपरसाठी अतिरिक्त रकमेची मागणी करणाऱ्या स्टॅम्प विक्रेता व त्याच्या मदतनीस महिलेस चंद्रपूर ॲन्टी करप्शन ब्युरो(एसीबी) च्या पथकाने रंगेहाथ अटक केल्याची घटना चंद्रपूर शहरात उघडकीस आल्याने परिसरात एकच खळबळ उडाली आहे.प्रकरणी मनिष अरूण देशमुख,मुद्रांक पेपर विक्रेता,रा.जलनगर वार्ड,चंद्रपूर व आरोपी मदतनीस रूपाली भरतलाल चौधरी यांना शासनाने ठरवून दिलेल्या नियमाचा व अधिकाराचा अप्रामाणीकपणे वापर करून शासनाने नेमुन दिलेल्या किंमतीपेक्षा अधिकच्या रूपयाची लाच मागणी करून स्वीकारल्याने दोन्ही आरोपींना ताब्यात घेण्यात आले आहे.

याबाबत अधिक माहिती अशी की,यातील तक्रारदार हे चंद्रपूर येथील रहिवासी असून त्यांना विज टेंडर कामाकरीता ५०० रूपयाचे ३ मुद्रांक पेपर्स(स्टॅम्प पेपर) व १०० रूपयाचे ५ मुद्रांक पेपर्स असे एकुण २ हजार रूपयाचे मुद्रांक पेपर्सची आवश्यकता होती. त्यासाठी तक्रारदार हे मुद्रांक विक्रेता मनिष देशमुख यांच्याकडे स्टॅम्प पेपर खरेदीकरिता गेले असता प्रत्येक ५०० रूपयाचे मुद्रांक पेपर्सवर ३० रुपये असे ३ पेपर्सचे ९० रूपये व प्रत्येक १०० रूपयाचे मुद्रांक पेपर्सवर १० रूपये असे ५ पेपर्सचे ५० रूपये असे एकुण २ हजार रूपयाचे मुद्रांक पेपर्सवर २ हजार रुपये शासकीय शुल्कासह अतिरीक्त १४० रूपये लाच दिल्याशिवाय मुद्रांक पेपर्स देणार नसल्याची तक्रारदार यांना खात्री होती.त्यामुळे तक्रारदार यांना लाच देण्याची ईच्छा नसल्याने त्यांनी गुरुवार ३० ऑक्टोंबर २०२५ रोजी लाचलुचपत प्रतिबंधक विभाग कार्यालय चंद्रपुर येथे प्रत्यक्ष हजर होऊन तक्रार दिली.तक्रारदार यांचे प्राप्त तक्रारीवरून काल,शुक्रवारी ३१ ऑक्टोंबरला लाचलुचपत प्रतिबंधक विभागाच्या पथकाने पंचासमक्ष पडताळणी केली असता मुद्रांक पेपर विक्रेता मनिष देशमुख याने २ हजार रूपयाचे मुद्रांक पेपर्सवर शासकीय शुल्कासह अतिरीक्त १४० रूपये लाच रक्कम असे एकुण २१४० रूपये लाच रक्कमेची मागणी करून स्विकारण्याची तयारी दर्शविली. त्यावरून काल,शुक्रवार ३१ ऑक्टोंबर २०२५ रोजी सापळा कार्यवाही दरम्यान मुद्रांक पेपर विक्रेता मनिष देशमुख यांनी शासकीय शुल्कासह अतिरीक्त १४० रूपये लाच रक्कम असे एकुण २ हजार १४० रूपये स्विकारून मदतनीस रूपाली  चौधरी हिचेकडे दिल्याने त्यांना रंगेहात पकडण्यात आले.दोन्ही आरोपींना ताब्यात घेण्यात आले असून पुढील तपासकार्य सुरू आहे.सदरची कार्यवाही डॉ.दिगंबर प्रधान पोलीस अधीक्षक, ला.प्र.वि.नागपूर,माधुरी बावीस्करअप्पर पोलीस अधीक्षक ला.प्र.वि.नागपूर,मंजुषा भोसले पोलीस उपअधीक्षक ला.प्र.वि.चंद्रपूर यांचे मार्गदर्शनात पोलीस निरीक्षक निलेश उरकुडे यांनी व सापळा पथक पोशि अमोल सिडाम,राकेश जांभुळकर,राजेंद्र चौधरी, म.पो.शि.पुष्पा काचोळे, चापोशि/सतिश सिडाम सर्व लाचलुचपत प्रतिबंधक विभाग,चंद्रपूर यांच्या पथकाने केली.

• नागरीकांना आवाहन👇

कोणत्याही शासकीय अधिकारी/कर्मचारी यांनी किंवा त्यांच्या वतीने खाजगी इसम(एजेंट)यांनी कोणतेही शासकीय काम करून देण्यासाठी कायदेशीर फी व्यतिरिक्त अन्य लाचेची मागणी करीत असल्यास तात्काळ आमचेशी संपर्क साधावा.