तीनजण नदीत बुडाले; वडील मुलगी आणि भाची..

चंद्रपूर :-नदीवर कपडे धुण्यासाठी गेलेल्या बाप- लेकीचा तसेच भाचीचा नदीत बुडून मृत्यू झाल्याची घटना आज, मंगळवार २८ एप्रिल रोजी सकाळी ११ वाजेच्या सुमारास चंद्रपूर जिल्ह्याच्या धानोरा गावाजवळील वर्धा नदी तीरावर घडली.राजू कोडापे वय ४० वर्षे,मुलगी अर्पिता कोडापे वय १२ वर्षे आणि भाची प्रियांका मडावी वय १४ वर्षे असे नदीत बुडून मृत पावलेल्यांची नावे असून बुडालेल्या तिघांपैकी अद्याप एकाही व्यक्तीचा मृतदेह सापडलेला नाही. घटनेची माहिती मिळताच घुग्घुस पोलीस ठाण्याचे पथक तात्काळ घटनास्थळी दाखल झाले.स्थानिक नागरिकांच्या मदतीने आज दिवसभर शोधमोहीम सुरू करण्यात आली.मात्र,अंधार वाढत गेल्यामुळे रात्री उशिरा शोधकार्य थांबविण्याचा निर्णय घेण्यात आला.प्रशासनाच्या वतीने उद्या,बुधवार सकाळपासून पुन्हा शोधमोहीम सुरू करण्यात येणार असून स्थानिक बचाव पथक आणि पोलीस प्रशासनाकडून शोधकार्य राबविण्यात येणार आहे.

चंद्रपूर जिल्ह्याच्या राजुरा तालुक्यातील खामोना येथील राजु कोडापे यांची बहीण धानोरा येथे राहात असल्याने ते आपल्या मुलीसह बहीणीकडे धानोरा येथे गेले होते.आज मंगळवारी सकाळी ११ वाजताच्या सुमारास चंद्रपूर-गडचांदूर मार्गावरील धानोरा गावातून वाहणाऱ्या वर्धा नदीवर राजू कोडापे आपली मुलगी अर्पिता कोडापे,भाची प्रियांका मडावी तसेच रोहन मडावी व सलोनी मडावी यांच्यासह कपडे धुण्यासाठी गेले होते.राजू कोडापे त्यांची मुलगी अर्पिता कोडापे व भाची प्रियांका मडावी हे तिघे जण अंघोळ करण्यासाठी नदीत गेले असता पाण्याचा अंदाज न आल्याने ते खोल पाण्यात बुडाले.यावेळी त्यांच्यासोबत असलेले रोहन मडावी व सलोनी मडावी यांनी त्यांना वाचविण्याचा प्रयत्न केला.परंतु,त्यांना अपयश आले.घटनेची माहिती मिळताच घुग्घुस पोलीस ठाण्याचे पथक तात्काळ घटनास्थळी दाखल झाले. परिसरातील नागरिकांनी घटनास्थळी धाव घेत मोठी गर्दी केली.