ई-रिक्षा उलटून प्रवासी महिलेचा मृत्यू; आरमोरी तालुक्यातील घटना..

आरमोरी(गडचिरोली):-आरमोरी तालुक्यातील डार्ली येथील रहिवासी असलेले पती-पत्नी कामे आटोपून ई-रिक्षाने स्वगावी परत जात असतांना वाटेतच रिक्षाला ट्रॅक्टरने धडक दिल्याने रिक्षा उलटला.यात प्रवासी असलेले पती-पत्नी खाली कोसळले.दोघांनाही जबर मार लागल्याने गडचिरोली सामान्य रुग्णालयात दाखल करण्यात आले.मात्र,महीलेच्या डोक्याला जबर दुखापत होऊन रक्तस्त्राव झाल्याने उपचारादरम्यान जिल्हा रुग्णालयात मृत्यू झाला.ललिता प्रकाश मडावी वय ४० वर्षे,रा.डार्ली,ता.आरमोरी,जि.गडचिरोली असे अपघातात मृत्यू झालेल्या महिलेचे नाव आहे.तर पती प्रकाश मडावी यांचेवर गडचिरोली सामान्य रुग्णालयात उपचार सुरू आहे.सदरची घटना काल, बुधवारी दुपारच्या सुमारास वडधा गावातील शिवाजी चौकाजवळ घडली.

माहितीनुसार,डार्ली येथील ललिता व प्रकाश मडावी हे दोघेही पती-पत्नी काही कामानिमित्त पोर्ला येथे गेले होते.पोर्लावरून कामे आटोपून ते ई-रिक्षाने स्वगावी परत जात असतांना वडधा गावातील शिवाजी चौकाजवळ ट्रॅक्टरने ई-रिक्षाला धडक दिली.यात रिक्षा उलटून ललिता या रस्त्यावर कोसळल्या.त्यामुळे डोक्याला जबर दुखापत होऊन रक्तस्त्राव झाला.घटना घडताच नागरिकांनी घटनास्थळी धाव घेत महिला व तिच्या पतीला उपजिल्हा रुग्णालयात दाखल करण्यात आले.मात्र,प्रकृती गंभीर असल्याने त्यांना गडचिरोली जिल्हा सामान्य रुग्णालयात पुढील उपचाराकरिता हलविण्यात आले.अश्यातच उपचारादरम्यान जिल्हा रुग्णालयात ललिता यांचा मृत्यू झाला.तर प्रकाश मडावी यांच्यावर उपचार सुरू आहे.घटनेचा पुढील तपास आरमोरी पोलीस प्रशासन करीत आहे.