मालवाहू ट्रकची उभ्या ट्रकला धडक; मजुराचा मृत्यू तर एकजण जखमी..

चंद्रपूर :-एका मालवाहू ट्रकने रस्त्यावर उभ्या असलेल्या ट्रकला जोराची धडक दिल्याने उभा असलेला ट्रक काही अंतरावर सरकून जवळच असलेल्या मार्केटमध्ये घुसल्याने मार्केटमध्ये काम करणाऱ्या मजुराचा मृत्यू झाला तर चालक गंभीर जखमी झाल्याची घटना आज,बुधवारी १५ जानेवारीच्या सकाळी सहाच्या सुमारास नागपूर- चंद्रपूर महामार्गावरील नागभीड तालुक्यातील तळोधी (बा.)शहरातील शिवाजी चौकाजवळ घडली.माधव नामदेव मांढरे वय ३५ वर्षे,रा.तळोधी (बा.),ता.नागभीड,जि.चंद्रपूर असे मृत मजुराचे नाव आहे.

माहितीनुसार,नागपूर येथून एमएच ४० वाय २९९० क्रमांकाचा ट्रक मूल येथे तांदूळ घेऊन निघाला होता.सकाळी ६ वाजेच्या सुमारास नागपूर चंद्रपूर मार्गावरील नागभीड तालुक्यातील तळोधी (बा.)येथे शिवाजी चौकाजवळ कबाडी सामान भरलेला ट्रक उभा होता.तर तिथेच जवळ अन्य एक खाली ट्रक उभा होता.तांदूळ घेऊन जाणाऱ्या ट्रकने कबाडी सामान भरलेल्या एम एच ३२ क्यू ५३७४ क्रमांकाच्या ट्रकला जोराची धडक दिली.त्यामुळे ट्रकमधील तांदळाचे कट्टे रस्त्यावर अस्ताव्यस्त पडले.तर धडकेमुळे उभा असलेला ट्रक ५० मीटर पर्यंत मागे सरकल्यामुळे रस्त्याच्या कडेला असलेला किशोर कटारे यांच्या मटण दुकानावर जाऊन आदळला.

या दुकानावर काम करणारा माधव मांढरे याला जबर धडक बसली.यामध्ये तो गंभीर जखमी झाला.घटनेची माहिती मिळताच तळोधी पोलिसांनी चंद्रपूर येथे खाजगी रुग्णालयात जखमींना हलविले. उपचारादरम्यान माधव मांढरे याचे निधन झाले. याबाबत ट्रक चालक रामेश्वर टेकचंद ठाकरे याच्यावर गुन्हा दाखल करण्यात आला आहे.सदर चालकही जखमी झाला आहे.त्याच्यावर स्थानिक रुग्णालयात उपचार सुरू आहे.