२२ वर्षीय तरुणाकडून तलवार जप्त..

चंद्रपूर :-विना परवाना हत्यार बाळगणे गुन्हा असतांनाही मिसरूड फुटण्याच्या अवस्थेत असलेली तरुण पिढी गुन्हेगारीच्या विश्वात पदार्पण करू पाहत आहे.गुन्हेगारीचे जग हे चिरकाल टिकणारे नसून त्याकडे वळण्यापेक्षा सर्वप्रथम शैक्षणिक शिक्षण घेणे आणि जीवनाचे सार्थक करून घेणे आवश्यक झाले आहे.आजची स्थिती आणि उद्याचे उज्वल भवितव्य घडवायचे असेल,तर शिक्षणाशिवाय पर्याय नाही,असे म्हणणे चुकीचे ठरणार नाही.मात्र,काही तरुण हिरोपंती करतांना दिसून येतात. अश्याच प्रकारे नागरिकांमध्ये दहशत निर्माण करू पाहणाऱ्या एका तरुणाचा प्रयत्न भद्रावती पोलिसांनी हाणून पाडला आहे.प्रकरणी भद्रावती पोलिसांनी सुमठाणा चौक परिसरातून एका २२ वर्षीय तरुणास अटक करून त्याच्याकडून धारदार लोखंडी तलवार जप्त केली आहे.प्रज्वल अशोक कोडापे वय २२ वर्षे, रा.शिवाजी नगर,भद्रावती,जि.चंद्रपूर असे आरोपी तरुणाचे नाव आहे.विना परवाना घातक हत्यार बाळगल्याप्रकरणी त्याच्यावर भारतीय हत्यार कायदा कलम ४,२५ अंतर्गत भद्रावती पोलीस ठाण्यात गुन्हा दाखल करण्यात आला आहे.प्रकरणी पुढील तपास भद्रावती पोलीस करत आहेत.सदरची कारवाई वरोरा उपविभागीय पोलीस अधिकारी संतोष बाकल यांच्या मार्गदर्शनाखाली भद्रावती पोलीस ठाण्याचे ठाणेदार योगेश्वर पारधी यांच्या नेतृत्वात पोलीस उपनिरीक्षक गजानन तुपकर,महेंद्र बेसरकर,पोलीस अंमलदार गोपाल आतकुलवार,जगदीश झाडे,अनुप आष्टुनकर,विश्वनाथ चुदरी,योगेश घाटोळे,खुशाल कावळे,रोहीत चिटगिरे व संतोष राठोड यांनी केली.