रेती डेपोंवर ड्रोनद्वारे पाळत; महसूल व खनिकर्म विभाग अलर्ट मोडवर..

भंडारा :-जिल्ह्याच्या तुमसर व मोहाडी तालुक्यात मोठ्या प्रमाणावर अवैध वाळू उपसा करून चेले- चपाटे आमचे कोणी वाकडे करूच शकत नाही; अशी बतावणी करून राजरोसपणे गौण खनिजाची चोरी करीत आहेत.त्यामुळे आमदार राजू कारेमोरे यांनी रेती चोरी प्रकरणाची लेखी तक्रार केल्याने भंडारा ते मुंबईपर्यंत महसूल व खनिकर्म विभाग अलर्ट मोडवर आला आहे.सध्या तुमसर व मोहाडी तालुका हा रेतीचा हॉटस्पॉट ठरला आहे.तुमसर व मोहाडी तालुक्यातील ११ शासकीय रेती डेपोंवर ड्रोनद्वारे पाळत ठेवण्यात येत आहे.सदरची कारवाई खनिकर्म विभागाच्या अधिकाऱ्यांनी केल्याची माहिती आहे.

तुमसर तालुक्यातील वैनगंगा व बावनथडी येथील नदी घाटात शासकीय रेती डेपो मंजूर करण्यात आले आहेत.मोहाडी तालुक्यातही काही शासकीय रेती घाटाला महसूल प्रशासनाने मंजुरी दिली आहे.अशातच तुमसर तालुक्यातील पांजरा,उमरवाडा, बाम्हनी,तामसवाडी, मांडवी व सोंड्या येथील रेती घाटावर ड्रोनने निगराणी करण्यात आली.असे असले तरी रेती डेपो होल्ड करुन ठेवलेल्या परिसरातुनच रेतीची मोठ्या प्रमाणात तस्करी होत असल्याची बाब समोर आली आहे.याकडेही लक्ष देणे गरजेचे आहे.तुमसर व मोहाडी तालुक्यातील रेती घाटातून रेतीची सर्रास चोरी होते अशा तक्रारी प्रशासनाला प्राप्त झाल्या आहेत.राज्याच्या शेवटच्या टोकावरील तुमसर व मोहाडी तालुका हा रेतीकरिता हॉटस्पॉट ठरला आहे.मुंबई मंत्रालयात या गंभीर बाबीची दखल घेण्यात आल्याची माहिती आहे.यावर आता कायमस्वरुपी तोडगा निघणार की ‘चलती का नाम गाडी’ होणार हे काही अवधीतच कळणार आहे.