रहस्यमयरित्या बेपत्ता झालेला चार वर्षीय चिमुकला आढळला जंगलातील डोंगरावर…

भंडारा :-रहस्यमयरित्या बेपत्ता झालेला चार वर्षीय चिमुकला अखेर आज,शनिवार ४ जानेवारीला दुपारी १ वाजताच्या सुमारास जंगलातील डोंगराच्या पायथ्यावर सुरक्षितरित्या आढळून आल्याने कुटुंबीयांनी तसेच गावातील नागरिकांसह वनविभाग आणि पोलिस विभागाने सुटकेचा निःश्वास सोडला आहे.नील मनोज चौधरी वय ४ वर्षे,रा.चिखला खाण ५२ टाइप क्वार्टर कॉलनी,ता.तुमसर, जि.भंडारा असे चार दिवसानंतर सापडलेल्या चिमुकल्याचे नाव आहे.

माहितीनुसार,नील चौधरा हा १ जानेवारी २०२५ रोजी दुपारच्या सुमारास घरासमोरील अंगणात खेळत असतांना रहस्यमयरित्या बेपत्ता झाला होता. कुटुंबीयांनी सर्वत्र शोधाशोध करुनही त्याचा थांगपत्ता लागत नसल्याने पोलीस ठाण्यात तक्रार दाखल केली.गावकरी तसेच सर्वत्र शंका-कुशंका वाढू लागल्या होत्या.ऐन १ जानेवारीला अंगणातून मुलगा गायब झाल्याने त्याचे अपहरण झाले असावे किंवा वन्यप्राण्याने त्याला उचलून नेले असावे,असा अंदाज वर्तविण्यात येत होता.त्यामुळे पोलिसांसह वन विभागाने त्याची शोधमोहिम सुरू केली होती.शोध मोहिमेदरम्यान ड्रोनसह श्वानपथकाचाही वापर करण्यात आला.परंतु,नीलचा शोध लागत नव्हता. अशातच गावातील ग्रामस्थ,पोलीस प्रशासन,वन विभागाचे कर्मचारी शोध घेत असतांना आज, शनिवारी ४ जानेवारीला दुपारी १ वाजताच्या सुमारास नील हा जंगलातील डोंगराच्या पायथ्यावर सुस्थितीत आढळून आला.४ दिवसांच्या कडाक्याच्या थंडीत निल हा जंगलात कसा राहिला,याबाबत आश्चर्य व्यक्त केले जात आहे.कुणीतरी नीलला टेकडीवर आणून सोडले असावे; अशी शंका व्यक्त केली जात आहे.

निल सापडताच त्याला गोबरवाही प्राथमिक आरोग्य केंद्रात दाखल करण्यात आले.बालकाची प्रकृती सध्या सामान्य आहे.सदर घडलेल्या घटनेमुळे परिसरातील नागरिक भयभीत झाले असून घडलेल्या घटनेचा पोलिसांनी छडा लावण्याची मागणी नागरिकांकडून व्यक्त होत आहे.