४५ वर्षीय मिस्त्रीने घराजवळच घेतला गळफास; पत्नीने फोडला हंबरडा..!

कोरची(गडचिरोली):-नवीन वर्षाचा पहिला दिवस उजळला आणि दुसरा दिवस संपण्याच्या रात्रीच मिस्त्रीचे काम करून कुटुंबाचे उदरनिर्वाह चालविणाऱ्या एका ४५ वर्षीय इसमाने घरा लगत असलेल्या वॉल कंपाऊंड नजीकच्या झाडाला गळफास घेऊन आत्महत्या केल्याची घटना काल, शुक्रवारी ३ जानेवारीला सकाळच्या सुमारास कोरची तालुक्यातील कोच्चीनारा येथे उघडकीस आली.किशोर चैत्राम बघवा वय ४५ वर्षे असे आत्महत्या केलेल्या मिस्त्रिचे नाव आहे.

याबाबत अधिक माहिती अशी की,नवीन वर्षाच्या २ तारखेला रात्रीच्या सुमारास किशोरने गळफास घेऊन आत्महत्या केली असल्याचे पत्नीला सकाळच्या सुमारास कळले.सकाळी उठून बघताच पती घरा लगत असलेल्या वॉल कंपाऊंड नजीकच्या झाडाला गळफास घेतलेल्या अवस्थेत दिसून आला.पतीला बघतच तिने आरडाओरड करून एकच हंबरडा फोडला.त्यामुळे घराशेजारील तसेच ग्रामस्थ गोळा होत बघ्यांनी मोठी गर्दी केली होती.घटनेची माहिती मिळताच पोलिसांनी घटनास्थळ गाठत पंचनामा करीत मृतदेह शवविच्छेदनासाठी कोरची ग्रामीण रुग्णालयात दाखल केला.किशोरच्या पश्चात पत्नीसह दोन मुले असून कर्जापायी किशोरने आत्महत्या केल्याची चर्चा गावकऱ्यांमध्ये दबक्या आवाजात सुरू आहे.