जंगली डुकराच्या हल्ल्यात महिला जखमी..

कोरची(गडचिरोली):-ग्रामीण भागात तेंदूपाने तोडण्याचा हंगाम सुरू झाला असून गावातील नागरिक जंगल परिसरात तेंदूपत्ता संकलन करण्यासाठी जात आहेत.अशातच तेंदूपाने तोडत असतांनाच एका महिलेवर जंगली डुकराने हल्ला चढवून जखमी केल्याची घटना काल बुधवारी कोरची तालुक्याच्या बिहटेकला येथे घडली.ऊर्मिला संतोष मिरी वय ४८ वर्षे,रा.बिहटेकला, ता.कोरची, जि.गडचिरोली,असे जंगली डुकराच्या हल्ल्यात जखमी झालेल्या महिलेचे नाव आहे.हल्ल्यात ऊर्मिलाच्या उजव्या पायाला व कमरेला दुखापत झाली असून तेंदूपाने संकलनासाठी बिहटेकला गावातील पलटण गंगाकाचूर,ज्योती टाटपलान,भारती ताटपलान,करिष्मा टाटपलान आणि ऊर्मिला मिरी जंगलात गेल्या होत्या.पाने तोडत असतांनाच अचानकपणे ऊर्मिलावर रानडुकराने हल्ला चढवला. त्यामुळे इतर महिला घाबरून ओरडल्या.ओरडताच जंगली डुकराने जंगलात धूम ठोकली.त्यानंतर

ऊर्मिलास ग्रामीण रुग्णालयात दाखल करण्यात आले. प्राथमिक उपचार करून तिला गडचिरोली जिल्हा रुग्णालयात हलविण्यात आले.बेळगावचे वनपरिक्षेत्र अधिकारी लक्ष्मीकांत ठाकरे यांनी भीमपूरचे वनरक्षक माही कुंजाम,कोटराचे क्षेत्र सहाय्यक अतकरे यांना पंचनामा करण्याचे आदेश दिले व जखमी महिलेस भरपाईचे आश्वासन दिले.