देसाईगंज तालुक्यातील राम मंदिरास सौंदर्यिकरणासह पर्यटन स्थळाचा दर्जा द्या- – सामाजिक कार्यकर्ते खेमराज नेवारे यांची मागणी

देसाईगंज(गडचिरोली):-देसाईगंज तालुक्यापासून अवघ्या दोन किलोमीटर अंतरावर असलेल्या आमगांव बुट्टी हे प्रसिद्ध असे ऐतिहासिक गाव आहे.या गावात सर्व जाती धर्माचे समाजबांधव एकोप्याने राहतात. सर्वजण पारंपारिक सण एकत्र मिळून साजरे करतात. या गावात प्राचीन काळापासून नावाजलेले राम मंदिर अस्तित्वात आहे.मंदिराच्या स्थापनेपासून अर्जुनी- मोरगांव येथील पालीवाल कुटुंबियांचे हे श्रद्धास्थान आहे.या मंदिरात राम,लक्ष्मण,सीता,हनुमान तसेच माता दुर्गाची मूर्ती स्थापना करण्यात आली आहे. दरवर्षी रामनवमीला मोठी जत्रा या ठिकाणी भरते. हजारोंच्या संख्येने श्रद्धाळू भाविक भक्त दर्शन घेण्यासाठी येत असतात.

या ठिकाणी अनेक सामाजिक व सांस्कृतिक कार्यक्रम घेतले जातात.मात्र,सदर मंदिराच्या ठिकाणी सौंदर्यिकरणाचा अभाव दिसून येतो.त्यामुळे मंदिरात हाईमास्ट लाईट तसेच आकर्षक उद्यान तयार करून आधुनिक सोयी सुविधा उपलब्ध करून सुशोभीकरण केले तर जिल्ह्यासह देश,विदेशातील पर्यटक सुद्धा या ठिकाणी आवर्जून भेटी देऊन रोजगाराच्या संधी निर्माण होऊ शकतात.त्याचप्रमाणे मुक्कामासाठी गेस्ट हाऊस तयार करणे आवश्यक आहे.राम मंदिर परिसराला सौंदर्यिकरणासह पर्यटन स्थळाचा दर्जा दिल्यास इतर राम मंदिरांसारखी प्रसिद्धी मिळून गडचिरोली जिल्ह्याचे नावलौकिक होईल,यासाठी आमगांव बुट्टी येथील राम मंदिराचे सौंदर्यिकरणासह पर्यटन स्थळाचा दर्जा देण्याची मागणी आरमोरी विधानसभा क्षेत्राचे तत्पर जागरूक युवा उमेदवार खेमराज नेवारे यांनी केली आहे.