चार्जरसाठी युवतीला अमानुषपणे मारहाण करणाऱ्या दोघांना गडचिरोली पोलिसांनी केली अटक… -पोलीस कोठडीत रवानगी; आरमोरी शहरातील घटना…

आरमोरी(गडचिरोली) :-आरमोरी शहरातील आरमोरी-वडसा टी पॉइंट मुख्य रस्त्यालगत शिवम कॅफे रेस्टॉरंटमध्ये काम करणाऱ्या १९ वर्षीय युवतीने मोबाईल चार्जर दिला नाही म्हणून तिला युवकांनी बेदम मारहाण केल्याची घटना १५ ऑगस्ट रोजी सकाळी ११.३० वाजताच्या दरम्यान घडली असल्याचा  प्रकार सीसीटीव्हीमध्ये कैद झाला आहे. युवतीच्या तक्रारीवरून आरोपी विरोधात गुन्हा दाखल करण्यात आला.सोहेल शेख वय ३० वर्षे रा.बर्डी वॉर्ड, आरमोरी व अयुब शेख ३८ वर्षे रा.कासार मोहल्ला, आरमोरी अशी आरोपींची नावे आहेत.

आरमोरी येथील आरमोरी-वडसा टी पॉइंट मुख्य रस्त्यालगत शिवम कॅफे रेस्टॉरंट आहे.मागील नऊ महिन्यांपासून १९ वर्षीय युवती हॉटेलमध्ये काम करीत आहे.स्वातंत्र्य दिनाच्या दिवशी आरोपी सोहेल व त्याची पत्नी रेस्टॉरंटमध्ये दोसा खाण्यासाठी आले. सोहेल याने पत्नीला रेस्टॉरंटमध्ये सोडून तो बाहेर कामासाठी निघून गेल्यानंतर सोहेलच्या पत्नीने युवतीस मोबाईल चार्जर मागितला.मालकाचा आदेश असल्याने मी तुम्हाला चार्जर देऊ शकत नाही; असे उत्तर युवतीने दिले.यानंतर सोहेलच्या पत्नीने तिच्याशी बाचाबाची करीत घटनेची माहिती तिने सोहेलला दिली.अवघ्या पाच मिनिटात आरोपी सोहेल हा रेस्टॉरंटमध्ये पोहोचला.काउंटरवर बसलेल्या युवतीचे केस धरून टेबलवर तिचे जोरजोराने डोके आपटले. लाथाबुक्क्यांनी मारहाण केली.सोहेलने फोन करून काही युवकांना बोलावून घेतले.यापैकी आरोपी अयुब शेखने युवतीला मारहाण केली; असे युवतीने तक्रारीत म्हटले आहे.

युवतीच्या तक्रारीवरून आरमोरी पोलिसांनी सोहेल शेख व अयुब शेख यांच्याविरोधात विनयभंग, लज्जास्पद वर्तणूक,अश्लील शिवीगाळ,जिवे मारण्याची धमकी दिल्याबद्दल गुन्हा दाखल केला.

सोहेल व त्याचा मित्र अयुब हेच खरे आरोपी असल्याचे सीसीटीव्हीवरून पोलिसांच्या लक्षात आले. आरोपींविरोधात गुन्हा दाखल करण्यात आला.मात्र, अटक कधी होणार,असा प्रश्न उपस्थित केला जात होता.त्यानुसार गुन्ह्यातील आरोपी सोहेल मेहमूद शेख व अब्दुल अयुब नासिर शेख हे फरार झाले होते. गडचिरोली पोलिस दलाने सदर दोन्ही फरार आरोपींचा शोध घेऊन आज,दिनांक-१९ ऑगस्टला सकाळच्या सुमारास अटक केली.अटकेनंतर दोन्ही आरोपींना न्यायालयासमोर हजर केले असता न्यायालयाने दोन्ही आरोपींना दोन दिवसांची पोलीस कोठडी सुनावली आहे.