गाडीवर झेप घेणार इतक्यातच दुचाकीचा वेग वाढविल्याने मोठा अनर्थ टळला..!

चंद्रपूर :-वाघ असो की बिबट्या अमुक माझा नातेवाईक हो..तमुक माझा नातलग हो..हे कधीच बघत नसतात.त्यामुळे हिंस्त्र प्राण्यांचा हल्ला हा हल्लाच असतो.अश्याच प्रकारची घटना चंद्रपूर जिल्ह्याच्या सिंदेवाही तालुक्याच्या नाचनभट्टी शिवारात उघडकीस आली आहे.चक्क वाघाने धावत्या दुचाकीवर झडप घातल्याने दुचाकीस्वाराचा काळजाचा ठोका धडधडला.सदरची घटना दोन दिवसांपूर्वी म्हणजेच बुधवारच्या सायंकाळी घडली.

अधिक माहिती अशी की,सिंदेवाही तालुक्याच्या इंदिरानगरातील रहिवासी स्वप्नील चौधरी हे नेहमीप्रमाणे बुधवारी सायंकाळी ७:३० वाजता इंदिरानगरातून आपल्या मुलासाठी दूध आणण्यास दुचाकीने स्मशानभूमीमार्गे नाचनभट्टीकडे जात होते.त्यातच अचानक स्मशानभूमी परिसरातून एक पट्टेदार वाघ दुचाकीकडे धावत आला.गाडीवर झेप घेणार इतक्यातच स्वप्नील यांनी प्रसंगावधान साधत दुचाकीचा वेग वाढविला.वेग वाढविल्याने वाघ दोन-चार फुटांच्या अंतराने मागे पडल्याने ते थोडक्यात बचावले.महत्वाचे म्हणजे,यापूर्वी रत्नापूरचे डॉ.हर्षद रामटेके,नाचनभट्टीचे नत्थूजी चौधरी,उमरवाहीचे धनराज बोरकर यांच्या दुचाकीवर बिबट्याने झेप घेतल्याची घटना घडली होती.अशा घटना परिसरात वारंवार घडत असल्याने विद्यार्थी व दुचाकीधारकांमध्ये प्रचंड दहशत पसरली आहे.