उद्रेक न्युज वृत्त
चंद्रपूर :- राजुरा तालुक्यातील धोपटाळा येथे गावकऱ्यांनी ट्रॅक्टरद्वारे रेतीतस्करी करणाऱ्यांवर हल्ला करून दगडफेक केली.यामध्ये ट्रॅक्टरवरील एक जण ठार तर अन्य दोन जण जखमी झाले आहेत.सदरची घटना बुधवारी दि.३ तारखेच्या रात्री ११.३० वाजताच्या सुमारास घटना घडली.याप्रकरणी राजुरा पोलिसांनी काल, गुरुवारी सकाळी पाच जणांना ताब्यात घेतले आहे.आणखी आरोपींचा शोध सुरू आहे.मोहम्मद शहादत खान वय ५२ वर्षे रा. सोनियानगर,राजूरा असे मृताचे नाव आहे. जखमींमध्ये ट्रॅक्टर मालक देविदास येवले वय ४७ वर्षे व मजूर कैलास कुळसंगे वय ३० वर्षे यांचा समावेश आहे.तर रोशन बावणे वय २८ वर्षे,बंडू कुकर्डे वय ४० वर्षे हे हल्ल्यातून थोडक्यात बचावले.
सविस्तर वृत्त असे की,राजुरा येथून पाच जण ट्रक्टरने सास्तीजवळील धोपटाळा नाल्यावर बुधवारी रात्री ११.३० वाजताच्या सुमारास रेती तस्करीसाठी गेले होते.ही बाब हेरून आधीच गावकऱ्यांनी त्यांना पकडून आणण्याचा बेत आखला होता.ट्रॅक्टर रेती घाटावर पोहचली.यानंतर गावकऱ्यांनी अचानक त्यांच्यावर धावा केला.ट्रॅक्टरमध्ये सुमारे दोन ते तीन घमेले रेती टाकण्यात आली होती.यानंतर गावकऱ्यांनी ट्रॅक्टरसह सर्वांना धोपटाळा येथील चौकात आणले. नंतर ‘आमच्या गावातून रेती चोरता’ असे म्हणत अचानक त्यांच्यावर दगडफेक करण्यात आली. यामध्ये एक जण छातीवर दगड लागल्याने खाली कोसळला.ट्रॅक्टरमधील इतर दोन जण जखमी झाले होते.जखमी व इतर दोघांनी जमिनीवर कोसळलेल्या मजुराला ट्रॅक्टरमध्ये टाकून राजुरा ग्रामीण रुग्णालयात नेले.डॉक्टरांनी तपासणीअंती त्याला मृत घोषित केले. या घटनेने रेती तस्करांमध्ये चांगलीच दहशत पसरल्याचे बोलले जात आहे.पुन्हा एकदा रेती तस्करीचा विषय ऐरणीवर आला आहे.पोलिसांनी गुन्ह्याची नोंद करीत आरोपींना अटक करण्यात आली.जिल्हा पोलिस अधीक्षक मुमक्का सुदर्शन, अपर पोलिस अधीक्षक रिना जनबंधू,स्थानिक गुन्हे शाखेचे प्रमुख महेश कोंडावार,उपविभागीय पोलिस अधिकारी दिपक साखरे,बल्लारपूर पोलिस स्टेशनचे ठाणेदार आसिफ राजा यांच्या मार्गदर्शनाखाली राजुरा पोलिस स्टेशनचे पोलिस निरीक्षक योगेश्वर पारधी, उपपोलिस निरीक्षक पांडुरंग हाके,नरेंद्र उरकुडे, सहाय्यक पोलिस निरीक्षक निशा भूते व सचिन पडवे यांनी कारवाई केली.
