अखेर नियमभंग केल्याप्रकरणी आमदारांकडून पाच हजाराचा दंड वसूल..

चंद्रपूर :-जिल्ह्याच्या ताडोबा-अंधारी व्याघ्र

प्रकल्पात वन्यजीवांचे संरक्षण आणि पर्यटनाची शिस्त राखण्यासाठी कठोर नियम लागू करण्यात आले आहेत. विशेषतः जंगल सफारीदरम्यान मोबाईल फोन वापरणे अथवा जवळ बाळगण्यावर सक्त मनाई करण्यात आली आहे.नियमभंग केल्यास संबंधित पर्यटकांवर दंडात्मक कारवाई करण्याची तरतूद आहे.दरम्यान,चंद्रपूर जिल्ह्याच्या वरोरा मतदारसंघाचे भारतीय जनता पक्षाचे आमदार करण देवतळे यांनी ताडोबा बफर क्षेत्रातील निमडेला पर्यटन गेटवरून ३० जानेवारी रोजी सपत्नीक जंगल सफारी केली होती.या सफारीदरम्यान त्यांनी मोबाईल फोनचा वापर केल्याचा प्रकार समोर आला. विशेष म्हणजे,त्यांनी तयार केलेली एक रिल सोशल मीडियावर पोस्ट केली होती.त्या व्हिडिओमध्ये जिप्सीच्या आरशात मोबाईल फोन दिसून आल्याने सफारीदरम्यान मोबाईल वापरल्याचे स्पष्ट झाले होते.अश्यातच सदरचा व्हिडिओ समोर आल्यानंतर ताडोबा प्रशासनाकडून कारवाई होणार का?याकडे सर्वांचे लक्ष लागले होते. सर्वसामान्य पर्यटकांकडून नियमभंग झाल्यास ताडोबा प्रशासन तात्काळ दंडात्मक कारवाई करते.त्यामुळे आमदारांवरही समान नियम लागू होणार काय?असा प्रश्न उपस्थित करण्यात आलेला असतांनाच अखेर ताडोबा-अंधारी टायगर रिझर्व कंझर्वेशन फाउंडेशन,चंद्रपूर यांच्या वतीने या प्रकरणाची दखल घेऊन आमदार करण देवतळे यांच्यावर कारवाई करण्यात आली आहे.सफारीदरम्यान मोबाईल फोनचा वापर केल्याप्रकरणी त्यांच्याकडून ५ हजार रुपयांचा दंड वसूल करण्यात आला असल्याचे ताडोबा-अंधारी व्याघ्र प्रकल्प प्रशासनाने स्पष्ट केले आहे.