वाघाच्या हल्ल्यात महिला ठार; आरमोरी तालुक्यातील घटना..

आरमोरी(गडचिरोली):-वाघाच्या हल्ल्यात महिला ठार झाल्याची घटना आज,मंगळवार २ डिसेंबरला दुपारच्या सुमारास आरमोरी तालुक्याच्या इंजेवारी गाव नजिक परिसरातील शेतशिवारात घडली.कुंदा खुशाल मेश्राम वय ६२ वर्षे,रा.इंजेवारी,ता.आरमोरी, जि.गडचिरोली असे वाघाच्या हल्ल्यात ठार झालेल्या महिलेचे नाव आहे.

कुंदा मेश्राम ह्या आज सकाळच्या सुमारास इंजेवारी गावापासून काही अंतरावर असलेल्या आपल्या शेतावर गेल्या होत्या.बराच वेळ होऊनही आजी घरी परतली नसल्याने नातू किसन हा शेतावर गेला होता.शेतावर आजी दिसून न आल्याने किसन घरी परतला.नंतर त्याने कुटुंबीयांसह गावातील नागरिकांना सोबत घेऊन शेत गाठले.परिसरात शोध घेतला असता काही अंतरावरच कुंदा मेश्राम मृतावस्थेत आढळून आल्या.चेहऱ्यावर तसेच शरीरावरील इतर जखमा पाहून वाघानेच हल्ला चढवल्याचे तसेच परिसरात वाघ्याच्या पाऊलखुणा आढळून आल्याने कुंदा मेश्राम यांना वाघाने ठार केल्याचे निष्पन्न झाले.प्रकरणी घटनेची माहिती आरमोरी वनविभागास देण्यात आली व पुढील प्रक्रिया पार पाडण्यात आली.घटनेने परिसरात दहशत पसरली असून वाघाचा तात्काळ बंदोबस्त करण्याची मागणी ग्रामस्थांनी केली आहे.