मोहफुले वेचत असतांनाच बिबट्याचा हल्ला.. – जंगलशिवारात छिन्नविच्छिन्न अवस्थेत आढळला मृतदेह..

भंडारा :-जिल्ह्याच्या तुमसर वनपरिक्षेत्राच्या हरदोली सहवनक्षेत्रातील ३३६ कक्ष क्रमांकाच्या सोनेगाव बीटातील एकमध्ये बिबट्याने मोहफुले वेचत असणाऱ्या महिलेच्या मानेवर हल्ला चढवून ठार केल्याची घटना काल शुक्रवारच्या सायंकाळी उघडकीस आल्याने परिसरात एकच खळबळ माजली आहे.साधना सीताराम उईके वय ५२ वर्षे,रा.धनेगाव, ता.तुमसर,जि.भंडारा असे बिबट्याच्या हल्ल्यात ठार झालेल्या महिलेचे नाव आहे.

धनेगाव येथील साधना उईके ह्या नेहमीप्रमाणे सकाळच्या सुमारास गावाशेजारील शेतशिवारात मोहफुले वेचण्यासाठी गेल्या होत्या.सकाळ होऊन दुपार झाली, तरीही त्या घरी न परतल्याने कुटुंबीयांना चिंता वाटू लागली.दररोज लवकर येणाऱ्या साधना घरी परत आल्या नसल्याने कुटूंबीय तसेच ग्रामस्थांनी शोध मोहीम सुरू केली.अश्यातच गावाजवळील जंगलशिवारात साधना उईके यांचा छिन्नविच्छिन्न अवस्थेत मृतदेह दिसून आला. लागलीच घटनेची माहिती वनविभागास तसेच पोलीस प्रशासनास मिळताच पथक घटनास्थळी दाखल झाले. घटनास्थळावरील प्रत्यक्ष पाहणीत साधना उईके यांच्यावर नेमका कोणत्या प्राण्याने हल्ला केला,याबाबत सायंकाळपर्यंत संभ्रम निर्माण झाला होता.उपस्थित काहींनी वाघ तर,काहींकडून बिबट असल्याचा अंदाज लावला जात होता.मात्र,घटनास्थळावरील परिस्थिती लक्षात घेता सदरचा हल्ला बिबट्यानेच केला असल्याचा अंदाज तुमसरचे वनपरिक्षेत्र अधिकारी छगण रहांगडाले यांनी व्यक्त केला.विशेष म्हणजे,मृतक महिलेच्या मानेवर दोन दात गडून असल्याचे स्पष्टपणे दिसत होते.त्यानंतर, मृतदेह शवविच्छेदानासाठी रवाना करण्यात आला. शवविच्छेदन अहवालानंतरच वाघ की बिबट्या हे स्पष्ट होणार असून घटनेमुळे धनेगाव आणि परिसरातील शेतकरी व मजुरांमध्ये प्रचंड दहशत पसरली आहे.