भंडारा-गडचिरोली समृद्धी महामार्गाला शेतकऱ्यांचा कडकडीत विरोध..! – शेकडो शेतकरी धडकले तहसील कार्यालयावर

भंडारा :-विदर्भात नागपूरपर्यंत समृद्धी महामार्ग पोहोचला आहे.पुढे त्याच्या विस्तार भंडाऱ्यापर्यंत व तेथून त्याचा विस्तार गडचिरोलीपर्यंत करण्याची घोषणा राज्य शासनाने घोषणा केल्यानंतर या मार्गाच्या सर्वेक्षण कामाला सुरुवात करण्यात आली आहे.मार्ग कोणत्या गावावरून जाईल व कोणत्या शेतकऱ्याची जमीन जाईल,हे निश्चित करण्यात आले आहे.त्यावरून या मार्गाचा आराखडा तयार करण्यात आला असून त्यानुसार जमीन हस्तांतरण करण्याबाबतच्या सूचना महसूल विभागास प्राप्त झाल्या आहेत.अशातच आज,गुरुवारी १६ जानेवारीला भंडारा जिल्ह्याच्या लाखांदूर तालुक्यातून गडचिरोली जिल्ह्यात जाणाऱ्या समृद्धी महामार्गाला लाखांदूर तालुक्यातील शेतकऱ्यांनी कडकडीत विरोध केला आहे.यासंदर्भात शेकडो शेतकऱ्यांनी तहसील कार्यालयावर धडक देत तहसीलदार यांच्या मार्फतीने

राज्याचे मुख्यमंत्री देवेंद्र फडणवीस यांना निवेदन सादर केले.लाखांदूर तालुक्यातून भंडारा ते गडचिरोली द्रुतगती महामार्ग जात असून संबंधित विभागाच्या वतीने जमीन हस्तांतरीत करण्यासाठी कारवाई सुरू केली.मात्र,सदर रस्त्यासाठी शेतकऱ्यांची जमीन अधिग्रहित करण्यापूर्वी शेतजमिनीची किंमत किती मिळणार? हे अद्यापही शेतकऱ्यांना कळविण्यात आले नाही.त्यामुळे शेतकरी संभ्रमित आहेत.शिवाय शासनाने बळजबरीने शेतीची मोजणी करणे सुरू केल्याचा आरोप शेतकऱ्यांनी केला आहे.