उद्रेक न्युज वृत्त
चंद्रपूर :- शहरातील कस्तुरबा मार्गावर असलेल्या प्रिन्स बार मालकाकडून नियमांचे उल्लंघन केल्याप्रकरणी शहर पोलिसांनी दिनांक-५ एप्रिल रोजी सकाळी ९ वाजता धाड टाकताच मद्य शौकीनांनी पळ काढला.मौका पंचनामा करून बार मालकाविरुद्ध योग्य ती कारवाई करावी; अशा आशयाचे पत्र शहर पोलिस व उपविभागीय पोलिस अधिकाऱ्यांनी राज्य उत्पादन शुल्क विभागाला पाठविले आहे.नियमान्वये बार ॲण्ड रेस्टॉरंट किंवा वाईन शॉपी सकाळी ११ वाजता उघडण्यात यावी; असा नियम आहे.पण काही दिवसांपासून प्रिन्स बार सकाळी ८ वाजताच उघडत असल्याची तक्रार शहर पोलिसांकडे प्राप्त झाली होती.त्यामुळे पाळत ठेवून शहर पोलिसांनी धाड टाकली.पोलिस धडकताच बारचे व्यवस्थापक व मद्यपींमध्ये खळबळ उडाली.मद्यपींनी तिथून पळ काढला.दरम्यान घटनास्थळी शहर पोलिस ठाण्याच्या ठाणेदार प्रभावती एकुर्के,उपविभागीय पोलिस अधिकारी सुधाकर यादव यांनीही भेट दिली.चौकशी अहवाल तयार करून पुढील कार्यवाहीसाठी राज्य उत्पादन शुल्क विभागाला सादर करण्यात आला आहे.
