प्राथमिक आरोग्य केंद्रात गेली अन् बिंग फुटले..! -१७ वर्षीय अल्पवयीन मुलगी सात महिन्यांची गर्भवती..

भंडारा :-पत्नीला रात्रीच्या सुमारास पोटदुखीचा त्रास जाणवल्याने पतीने तिला प्राथमिक आरोग्य केंद्रात दाखल केले.तिथे तपासणीदरम्यान उपस्थित डॉक्टरांनी मुलगी गर्भवती असल्याचे लक्षात येताच तिच्या वयाबाबत पडताळणी केली.पडताळणीत अवघ्या १७ वर्षाची अल्पवयीन मुलगी सात महिन्यांची गर्भवती असल्याचे निष्पन्न झाल्याने अल्पवयीन मुलीचा विवाह करून तिला गर्भवती करणाऱ्या पतीसह कुटुंबीयांविरुद्ध बालविवाह प्रतिबंधक कायदा २००६,लैंगिक गुन्ह्यांपासून बालकांचे संरक्षण कायदा २०१२ आणि भारतीय दंड संहितेतील संबंधित कलमांनुसार मोहाडी तालुक्याच्या करडी पोलिस ठाण्यात गुन्हा नोंदविण्यात आला आहे.विशेष म्हणजे, पीडित मुलगी आणि तिचा पती हे दोघेही अल्पवयीन आहेत.गोपाळ या भटक्या समाजातील पती अक्षय प्रकाश शेंदरे वय १७ वर्षे,रा.खांबा/जांभळी,ता. साकोली,हल्ली मुक्काम नरसिंहटोला,मोहाडी याने अल्पवयीन मुलीसोबत विवाह केला होता.पीडित मुलगी सात महिन्यांची गर्भवती असल्याचे समजताच पोलिसांनी तात्काळ कारवाई केली.या प्रकरणात पीडितेचे आई-वडील प्रल्हाद शालीकराम शिवनकर वय ४० वर्षे,लता प्रल्हाद शिवनकर वय ३५ वर्षे, दोघेही राहणार अर्जुनी-तिरोडा तसेच सासू-सासरे प्रकाश शालीकराम शेंदरे वय ४० वर्षे आणि गिता प्रकाश शेंदरे वय ३६ वर्षे, राहणार खांबा/जांभळी,ता. साकोली यांच्याविरुद्ध गुन्हा दाखल करण्यात आला. आरोपी पतीला पोलिसांनी तात्काळ अटक केली आहे.