शालार्थ आयडी घोटाळ्यातील अटक आरोपी ‘अब तक ट्वेंटी’..! – घोटाळेबाजांची टोळी; दोन सख्खे भाऊ अटकेत..

नागपूर :-शालार्थ आयडी घोटाळा हा लहान-सहान घोटाळा नसून यात घोटाळेबाजांची टोळी असल्याचे उघड होत आहे.यापूर्वी केवळ बनावट शालार्थ आयडी घोटाळ्यात तब्बल १८ जणांना अटक करण्यात आली होती.अश्यातच आता काल रविवारी एसआयटीने लिपिक असलेल्या दोन सख्ख्या भावांना अटक केल्याने आरोपींनी ‘अब तक ट्वेंटी’ ची संख्या पार केली आहे.यात तीन शिक्षण उपसंचालक,तीन शिक्षणाधिकारी, सहा लिपिक,दोन शाळा मुख्याध्यापक,दोन शाळा संचालक,तीन सहाय्यक शिक्षक व वेतन अधीक्षक नीलेश वाघमारे यांचा समावेश आहे.काल अटक झालेल्यात चौकशीदरम्यान हुडकेश्वर येथील श्रावणजी वाटकर उच्च प्राथमिक शाळेतील कनिष्ठ लिपिक मंगेश केशव निनावे वय ३५ वर्षे व नंदनवनमधील केशवनगर उच्च प्राथमिक शाळेतील कनिष्ठ लिपिक मनीषकुमार केशव निनावे वय ३२ वर्षे यांची नावे समोर आली.दोघेही सख्खे भाऊ असून त्यांचे राहणे ओंकारनगर येथील प्रज्योती कोर्ट अपार्टमेंट येथे आहे.या दोघांचीही नियुक्ती बनावट शालार्थ आयडीच्या माध्यमातून झाली होती.मंगेशची नियुक्ती मार्च २०२३ मध्ये झाली होती.तर मनीषकुमार हा जुलै २०१९ पासून नोकरीवर लागला होता.या दोघांनीही त्यांच्या नोकरीच्या या कार्यकाळात ४१ लाख ४९ हजार इतके वेतन घेतले.त्यांनी अधिकारी व दलालांच्या माध्यमातून बोगस शालार्थ आयडी तयार करवून घेतला होता.चौकशीतून ही बाब स्पष्ट होताच पोलिसांनी दोघांनाही काल रविवारी अटक केली.