पहिल्यांदा दोन वर्षीय मुलीला लटकवले फासावर व नंतर स्वतःही घेतला गळफास..!

बीड :-जिल्ह्याच्या गेवराई तालुक्यात एक धक्कादायक तितकाच काळीज पिटाळून लावणी घटना आज,सोमवार १८ ऑगस्ट रोजी दुपारच्या सुमारास घडली.चक्क आईने पोटच्या गोळ्याला गळफास लावून मारून टाकले आणि स्वतःही आयुष्याची दोर कापत जीवन संपविल्याने परिसरातील समाजमन सुन्न झाले आहे.सदरची घटना ही गेवराई तालुक्यातील मालेगाव येथे घडली.२५ वर्षीय अंकिता बळीराम घवाडे व दोन वर्षीय शिवप्रीती बळीराम घवाडे रा.मालेगाव,ता.गेवराई,जि.बीड असे मृत पावलेल्या आई व मुलीचे नाव आहे.

आज श्रावणातील शेवटचा सोमवार असल्याने घरातील सर्व कुटुंबीय धार्मिक कार्यक्रमासाठी बाहेर गेले होते.घरी अंकिता व चिमुकली होती.अश्यातच दुपारच्या सुमारास अंकिताने सर्वप्रथम आपल्या दोन वर्षीय मुलीला फासावर लटकवले व नंतर घराच्या आड्याला स्वतःही गळफास घेऊन जीवनयात्रा संपविली.घटनेची माहिती शेजारील नागरिकांना होताच त्यांनी पोलिसांना पाचारण केले.पोलिसांनी घटनास्थळ गाठत माय-लेकीचे मृतदेह बीडच्या शासकीय रुग्णालयात शवविच्छेदनासाठी पाठविले. माय लेकीच्या मृत्यूचे कारण गावकऱ्यांना तसेच पोलिसांनाही कळले नसून त्या दिशेने पोलिसांकडून तपास सुरू आहे.