खेळता-खेळता झोक्याने घेतला चिमुकलीचा जीव..

बीड :-लहान बहिणीसह झोक्याचा खेळ खेळत असतांनाच अचानकपणे गळ्याला फास आवळून एका नऊ वर्षाच्या चिमुकलीचा दुर्दैवी मृत्यू झाल्याची घटना आज,मंगळवार ३१ मार्च रोजी सकाळच्या सुमारास बीड जिल्ह्याच्या माजलगाव शहरात घडली.वृंदा समीर रुद्रवार वय ९ वर्षे,रा.खंडोबा मैदान परिसर,माजलगाव,जि.बीड असे मृत पावलेल्या चिमुकलीचे नाव असून ती ईगलवुड शाळेत इयत्ता दुसरीत शिकत होती.अचानक घडलेल्या घटनेने रुद्रवार परिवारावर शोककळा पसरली असून परिसरात हळहळ व्यक्त केली जात आहे.

नऊ वर्षीय वृंदा आज सकाळच्या सुमारास तिच्या लहान बहिणीसह घरातील वरच्या मजल्यावर असलेल्या झोक्यावर(दोरीचा पाळणा)खेळत होती.दरम्यान,खुर्चीवर चढून झोका हातात घेत असतांना खुर्ची खाली पडली आणि वृंदाला झोक्याचा गळफास बसला.गळफास बसताच वृंदाचा जागीच मृत्यू झाला.बराच वेळ होऊनही मुलगी जेवण करण्यासाठी खाली कां आली नाही? हे पाहण्यासाठी तिची आई वरच्या मजल्यावर गेली असता मुलगी गळफास बसलेल्या अवस्थेत दिसून आली. मुलीला पाहून आईने एकच आक्रोश केला.आवाज ऐकून आजी,आजोबा व  वडिलांनी धाव घेत तात्काळ वृंदाला रुग्णालयात नेले.तोपर्यंत खूप उशीर झाला होता. तपासणीअंती डॉक्टरांनी वृंदाला मृत घोषित केले. चिमुकलीच्या दुर्दैवी मृत्यूने रुद्रवार कुटुंबियांवर मोठा आघात झाला आहे.