अखेर लाचखोर विभागीय वन अधिकाऱ्यास चार दिवसांची पोलीस कोठडी..

बीड :-राज्याच्या उपमुख्यमंत्री तथा बीड जिल्ह्याच्या पालकमंत्री सुनेत्रा पवार यांच्या अध्यक्षतेखाली शुक्रवारी ३१ जुलै रोजी जशी जिल्हा नियोजन समितीची बैठक पार पडली,तशीच सामाजिक वनीकरण विभागाचा विभागीय वन अधिकारी श्रीनिवास लिंगन्ना लखमावाड याच्या घरी छत्रपती संभाजीनगर लाच लुचपत प्रतिबंधक विभागाने धाड मारून त्यास रंगेहाथ अटक केली. तक्रारदार हे दुसरे कुणी नसून सामाजिक वनीकरण विभागाचे वन परिक्षेत्र अधिकारी(RFO)असल्याने एकच खळबळ माजली.लाखो रुपयांचा पगारदार माणूस तब्बल ४५ लाख रुपयांची मागणी करून सापडतो,तर सदरच्या विभागात किती भ्रष्टाचार गुंफलेला असेल,अशी बोंबाबोंब अनेकांच्या मनात घर करून राहिली आहे. महत्वाचे म्हणजे,आरएफओ(RFO)चा बॉस डीएफओ (DFO),त्याचीच बोलती बंद करून टाकल्याने अनेकांनी चुप्पी साधली आहे.धक्कादायक बाब म्हणजे,आरोपी अधिकाऱ्याने तक्रारदाराचा २०२४ मधील सुमारे ४० लाख रुपयांचा निधी रोखून धरला होता.इतकेच नव्हे तर २०२५ मधील निधीसुद्धा मार्च एंडला तीन टप्प्यांत दिला.

निधी अडकवून ठेवून अधिकाऱ्यांना वेठीस धरणे आणि लाच उकळणे ही लखमावाडची दुहेरी शक्कल होती. सध्या एसीबी पथक लखमावाड याच्या इतर संपत्तीची आणि बेकायदेशीर व्यवहारांची सखोल चौकशी करत असून यात आणखी काही खुलासे होण्याची शक्यता व्यक्त केली जात आहे.विशेष म्हणजे,लाचखोर लखमावाड हा २०१६ साली एमपीएससीच्या परीक्षेत अनुसूचित जाती प्रवर्गातून राज्यात टॉपर बनला होता. अश्यातच लाचखोरी प्रकरणात एसीबीच्या पथकाने लखमावाड याच्या घरांवर छापे टाकले.नांदेड जिल्ह्याच्या धर्माबाद तालुक्यातील रत्नाळी येथील मूळ निवासस्थानी तसेच बीड येथील घराची कसून झडती घेतली असता कारवाईत १ लाख ७ हजार रुपयांची कॅश आणि सुमारे ३ तोळे सोन्याचे दागिने जप्त करण्यात आले.दरम्यान, लखमावाड यास बीड न्यायालयात हजर केले असता न्यायालयाने त्याला ४ दिवसांची पोलिस कोठडी सुनावली आहे.