तब्बल १३ वर्षे सेवा बजावलेल्या शिक्षकाने गळफास घेऊन संपवली जीवनयात्रा..!

भंडारा :-मनमिळावू स्वभाव असलेल्या शिक्षकाने अचानकपणे टोकाचे पाऊल उचलत जंगलातील एका झाडाला नायलॉन दोरीने गळफास घेऊन जीवनयात्रा संपविल्याने अनेकांना आश्चर्याचा धक्काच बसला आहे.रमेश शामराव पंचबुद्धे वय ४२ वर्षे रा.खुर्शीपार, ता.भंडारा असे गळफास घेऊन आत्महत्या केलेल्या शिक्षकाचे नाव असून त्यांनी तब्बल १३ वर्षे सेवा बजावली होती.ते मानेगाव बाजार येथील चैतन्य विद्यालय व कनिष्ठ महाविद्यालयात इंग्रजी विषयाचे शिक्षक होते.

रमेश पंचबुद्धे हे काल सोमवारी सकाळच्या सुमारास शाळेत कर्तव्यावर न जाता भंडारा तालुक्याच्या रावणवाडी-धारगाव जंगल परिसरात गेले होते.त्यांच्या मनात काय घर करून सोडत होते,याची कल्पना कुणालाही आली नाही.अश्यातच दुपारी १ वाजेच्या सुमारास काही नागरिकांना रावणवाडीच्या जंगलात एका झाडाला नायलॉन दोरीने गळफास घेतलेल्या स्थितीत त्यांचा मृतदेह दिसून आला.लागलीच सदरची माहिती अड्याळ पोलिसांना देण्यात आली. घटनास्थळी अड्याळ पोलिसांचे पथक दाखल होत पंचनामा करून मृतदेह उत्तरीय तपासणीसाठी अड्याळ ग्रामीण रुग्णालयात पाठवला.रमेश पंचबुद्धे यांनी आत्महत्या कां केली,याचा शोध अड्याळ पोलिस प्रशासन करीत आहे.रमेश पंचबुद्धे यांच्या पश्चात पत्नी,दोन मुली असा आप्त परिवार आहे.