डिझेलचा टँकर पलटी होताच इंधन नेण्यासाठी लोकांची झुंबड..

वर्धा :-आधीच इंधन कमतरतेमुळे पेट्रोल पंपावर गर्दी होतांना दिसून येते.अश्यातच एखाद्या घटनेत चक्क इंधनाचा टँकर पलटी होऊन डिझेलचा महापूर होत असल्याची बाब लोकांना माहीत पडली तर..अशीच काहीशी घटना आज,बुधवार ३ जून रोजी सकाळी अकरा वाजेच्या सुमारास वर्धा जिल्ह्याच्या समुद्रपूर तालुक्यातील तरोडा ते बोथुडा मार्गावर घडली.टँकर पलटी झाल्याची बातमी परिसरात वाऱ्यासारखी पसरताच स्थानिक ग्रामस्थांनी डिझेल गोळा करण्यासाठी मिळेल त्या भांड्यासह घटनास्थळी धाव घेतली.लोकांनी चक्क ड्रम,बॅरेल,बादल्या आणि डबे घेऊन खाली सांडलेले डिझेल भरण्यासाठी एकमेकांवर तुटून पडले. टँकरमधून मोठ्या प्रमाणावर डिझेल बाहेर पडल्याने ते जवळच्या शेतात साचले होते,ते गोळा करण्यासाठी लोकांची मोठी झुंबड उडाली.डिझेलने भरलेला टँकर आज सकाळी समुद्रपूरच्या दिशेने जात असतांना अचानकपणे वाहनाचे टायर फुटले आणि चालकाचे वाहनावरील नियंत्रण सुटले.दरम्यान,टँकर महामार्गाच्या कडेला असलेल्या शेतात जाऊन पलटी झाला.सुदैवाने दुर्घटनेत कोणतीही जीवितहानी झाली नाही.मात्र, परिसरातील नागरिकांनी काहीकाळ डिझेल नेण्याचा सपाटा लावला.घटनेची माहिती मिळताच हिंगणघाट पोलिसांनी तातडीने घटनास्थळी धाव घेतली.पोलिसांनी हस्तक्षेप केल्यानंतर नागरिकांनी डिझेल नेणे बंद केले.