चेक बाऊन्स प्रकरणी कर्जदाराला सहा महिन्याचा कारावास..

वर्धा :-कित्येकदा अनेकजण राष्ट्रीयकृत बँका वा इतर पतसंस्थांकडून कर्ज उचलून त्यांची परतफेड करण्याचे टाळत असतात.त्यातच,काहीजण बँकेच्या खात्यात रक्कम नसतांनाही चेक देऊन परतफेडीचा मोठा दावा करतात आणि आपल्याच पायावर डोके आपटून बसतात.अश्याच प्रकारची घटना वर्धा जिल्ह्याच्या हिंगणघाट शहरातून समोर आली आहे.विशेष म्हणजे, कर्जदाराने कर्ज तर घेतले,पण त्याची परतफेडही केली नाही आणि उलट ज्या बँकेच्या खात्यात पैसे नव्हते, अश्या बँकेचा चेक दिला.प्रकरणी पतसंस्थेने न्यायालयात धाव घेत कर्जदाराला धडा शिकवला.न्यायालयाने तक्रारदार व आरोपी पक्षाची बाजू ऐकूण घेतल्यानंतर गुन्हा सिध्द झाल्याने कर्जदारास सहा महिन्यांच्या साध्या कारावासाची शिक्षा व पतसंस्थेस नुकसानभरपाई देण्याचे आदेश दिले.नरेश बबनराव नागोसे असे कर्जदार आरोपीचे नाव आहे.

नरेश नागोसे यांनी हिंगणघाट शहरातील संत तुकडोजी नागरी सहकारी पतसंस्थेकडून ३ डिसेंबर २०२४ रोजी पतसंस्थेच्या नियम व अटीनुसार तसेच आवश्यक ते दस्तऐवज करून ७० हजार रुपयाचे कर्ज घेतले होते. कर्जाची परतफेड न केल्याने पतसंस्थेने कर्ज रकमेचा हप्ता भरण्याची विनंती कर्जदार नागोसे यांना केली.मात्र, त्यांनी कर्ज भरण्यासाठी ९९ हजाराचा चेक(धनादेश) पतसंस्थेला दिला.धनादेश अनादरीत(चेक बाऊन्स) झाल्याने पतसंस्थेचे व्यवस्थापक मधुसूदन वामनराव कानकाटे यांनी हे प्रकरण शहरातील मुख्य न्यायदंडाधिकारी यांचे न्यायालयात कलम १३८ नुसार दाखल केले.या प्रकरणी कर्जदार नरेश नागोसे यास अतिरिक्त मुख्य न्यायदंडाधिकारी ए.एच.सैयद यांनी सहा महिन्यांच्या साध्या कारावासाची शिक्षा व ९९ हजार रूपये नुकसानभरपाई देण्याचे आदेश दिले.