शेतातील धुऱ्यावरून पाय घसरून बांधीत पडला तो उठलाच नाही..!

भंडारा :-जिल्ह्याच्या लाखांदूर तालुक्यातील कुडेगाव शेत शिवारात हृदयद्रावक घटना उघडकीस आली आहे.धान पिकाची पाहणी करण्यासाठी शेतावर गेलेल्या एका शेतकऱ्याचा शेतातील धुऱ्यावरून चालत जात असतांनाच पाय घसरला आणि तो थेट बांधीत पडला.बांधीत पाणी व चिखल असल्याने शेतकऱ्याच्या नाका तोंडात गेले.त्यामुळे श्वास कोंडला गेला आणि शेतकऱ्याचा गुदमरून मृत्यू झाला.दिनेश बाळकृष्ण शिवणकर वय ५० वर्षे, रा.कुडेगाव असे मृत शेतकऱ्याचे नाव आहे.

दिनेश शिवणकर हे काल बुधवारी दुपारच्या सुमारास शेतावर धान पिकाची पाहणी करण्यासाठी गेले होते. पायी जात असतांना दिनेश यांचा पाय घसरल्याने शेतात साचलेले पाणी व चिखलात ते कोसळले.यात त्यांच्या नाका-तोंडात पाणी व चिखल गेल्याने त्यांचा गुदमरून मृत्यू झाला.सदरची घटना शेतशिवारातून घरी परत येणाऱ्या शेतकऱ्यांच्या लक्षात येताच त्यांनी सदर घटनेची माहिती पीडित शेतकऱ्याच्या कुटुंबांसह लाखांदूर पोलिसांना देताच घटनास्थळी पोलिस अंमलदार विकास रणदिवे यांचेसह पोलिस हवालदार सतीश सिंगनजुडे घटनास्थळी दाखल होत घटनेचा पंचनामा करीत मृतदेह शवविच्छेदनासाठी लाखांदूर रुग्णालयात पाठविला. लाखांदूर पोलिसांनी आकस्मिक मृत्यूची नोंद करून पुढील तपास सुरू आहे.