वाघ आढळला मृतावस्थेत; परिसरात खळबळ..

चंद्रपूर :-जिल्ह्याच्या सावली वनपरिक्षेत्रातील चितेगाव बिट आणि राजोली राऊंड अंतर्गत येणाऱ्या मूल तालुक्यातील चिखली चक क्र.२ येथील बिगर वनक्षेत्रात सर्व्हे क्रमांक ७८ मध्ये आज,मंगळवार ३० जून रोजी दुपारच्या सुमारास एक नर वाघ मृतावस्थेत आढळून आल्याने परिसरात एकच खळबळ उडाली.मृत वाघाचे वय अंदाजे ६ ते ७ वर्षे असून प्राथमिक अंदाजानुसार, वाघाचा मृत्यू एक दिवसापूर्वी  झाला असावा,अशी शक्यता वर्तविण्यात आली.घटनेची माहिती मिळताच एसीएफ विकास तरसे, सावलीचे वनपरिक्षेत्र अधिकारी विनोद धुर्वे, वाइल्डलाईफ प्रोटेक्शन सोसायटी ऑफ इंडियाचे  प्रतिनिधी मुकेश भांदककर,इको-प्रोचे प्रतिनिधी राजू काहीलकर यांच्यासह पशुवैद्यकीय अधिकारी आणि तज्ज्ञ घटनास्थळी दाखल झाले.यावेळी नॅशनल टायगर कन्झर्व्हेशन अथॉरिटी प्रतिनिधींच्या उपस्थितीत मृतदेहाची सविस्तर पाहणी करण्यात आली. तपासणीदरम्यान वाघाचे सर्व अवयव सुस्थितीत असल्याचे आढळून आले.दरम्यान,वाघाच्या मृतदेहाचे शवविच्छेदन करण्यात आले.वाघाच्या मृत्यूचे नेमके कारण अद्याप स्पष्ट झाले नसून,त्यासंदर्भात अधिक तपास सुरू आहे.