रानडुकरासह वाघाचा शेतातील विहिरीत पडून मृत्यू…

भंडारा :-एका रानडुकराचा शिकारीसाठी पाठलाग करणे वाघाला महागात पडले आहे.शिकार करता-करता चक्क वाघ आणि रानडुक्कर शेतातील विहिरीत पडून मृत्यू झाल्याची घटना आज,शुक्रवार १८ एप्रिल रोजी सकाळच्या सुमारास भंडारा जिल्ह्याच्या तुमसर तालुक्यातील नाकाडोंगरी वनपरिक्षेत्राअंतर्गत येणाऱ्या चिखला येथे उघडकीस आली.

माहितीनुसार,चिखला येथील शेतकरी कवनलाल धुर्वे हे सकाळच्या सुमारास आपल्या शेतावर गेले होते.शेतातील विहिरीच्या पाण्याची पातळी पाहण्यासाठी विहिरीजवळ गेले असता,त्यांना विहिरीतील पाण्यात पट्टेदार वाघ व रानडुक्कर मृतावस्थेत आढळून आले.सदर घटनेची माहिती शेतकरी कवनलाल धुर्वे यांनी नाका डोंगरी वनपरीक्षेत्र कार्यालयास दिली.माहिती मिळताच वन कर्मचारी घटनास्थळी दाखल झाले.वन कर्मचाऱ्यांनी घटनास्थळाचा पंचनामा करुन वाघ व रानडुकराचे शव विहिरीबाहेर काढले.वन विभागाचे वन परिक्षेत्र अधिकारी व पशुसंवर्धन अधिकारी यांच्या उपस्थितीत वाघाचे व रानडुकराचे शवविच्छेदन करून घटनास्थळी अंत्यसंस्कार करण्यात आले.