ब्रम्हपुरी-आरमोरी मार्गावर सापळा; वन्य प्राण्यांची शिकार करणारे दोघेजण ताब्यात..

चंद्रपूर :-जिल्ह्याच्या ब्रम्हपुरी परिसरात वन्य प्राण्यांची शिकार करून चोरटी वाहतूक केली जात असल्याची गुपित माहिती चंद्रपूर स्थानिक गुन्हे शाखेच्या(एलसीबी) पथकास मिळताच ब्रम्हपुरी-आरमोरी मार्गावरील रेल्वे क्रॉसिंगजवळ सापळा रचत दोघांना अटक करून त्यांच्याकडून तीन मृत जंगली डुक्कर,भरमार बंदूक, दारुगोळा व इतर साहित्य जप्त करण्यात आल्याची घटना आज,शुक्रवार १८ जुलै रोजी ब्रम्हपुरी शहरात उघडकीस आली.३१ वर्षीय कुंदनसिंग शेरसिंग भुराणी व २१ वर्षीय विजयसिंग सुरतसिंग भुराणी दोघेही रा.पेठ वार्ड,ब्रम्हपुरी, जि.चंद्रपूर अशी अटक करण्यात आलेल्या आरोपींची नावे आहेत.एलसीबी पथकास माहिती मिळताच रेल्वे क्रॉसिंगजवळ एका मोपेड वाहनास थांबविले.सदर वाहनाची तपासणी केली असता, तपासादरम्यान वाहनात ३ मृत जंगली डुक्कर,१ भरमार बंदूक (अग्नीशस्त्र), दारुगोळा व शिकारीसाठी लागणारे इतर साहित्य आढळून आल्याने प्रकरणी दोन्ही आरोपींविरुद्ध वन्य प्राणी संरक्षण अधिनियम १९७२ तसेच शस्त्र अधिनियम विविध कलमांतर्गत गुन्हा दाखल करण्यात आला आहे. पुढील कारवाईसाठी आरोपी व जप्त सामग्री वन विभागाच्या ताब्यात देण्यात आली असून सदरची कारवाई पोलीस अधीक्षक मुम्मका सुदर्शन आणि अप्पर पोलीस अधीक्षक कातकडे यांच्या मार्गदर्शनाखाली स्थानिक गुन्हे शाखेचे पोलीस निरीक्षक अमोल काचोरे यांच्या नेतृत्वात सहाय्यक पोलीस निरीक्षक बलराम झाडोकर,पोलीस उपनिरीक्षक संतोष निंभोरकर, पोलीस अंमलदार गणेश भोयर,अजित शेंडे,नितेश महात्मे,प्रदीप मडावी यांनी केली.