पैश्यासाठी पोटच्या पोराने वडिलाच्या डोक्यावर कुऱ्हाडीने वार करून केले ठार..

चंद्रपूर :-एका ३५ वर्षीय पोटच्या पोराने क्षुल्लकशा वादातून रागाच्या भरात वडिलाच्या डोक्यावर कुऱ्हाडीने वार करून ठार केल्याची घटना चंद्रपूर जिल्ह्याच्या वरोरा तालुक्यातील शेगावातील विठ्ठल मंदिर वॉर्ड परिसरात काल शनिवारी दुपारी बारा वाजेच्या सुमारास घडली.अभय गुलाब दातारकर असे आरोपी मुलाचे नाव आहे,तर ६५ वर्षीय गुलाब पत्रुजी दातारकर असे मृताचे नाव आहे.

• शेतीच्या पैश्याचा वाद👇

काही वर्षापूर्वी गुलाब यांनी शेती विकली होती.शेती विकल्याने आरोपी अभय वडिलांना पैश्याची मागणी करायचा.यासाठी तो नेहमी पैशावरून आई-वडिलांसोबत वाद घालायचा.अश्यातच काही दिवसांपूर्वी त्याने पैश्यासाठी वडिलांना मारहाण केली होती.काल शनिवारी सकाळपासूनच बाप व मुलामध्ये पैश्यासाठी भांडण सुरू झाले.भांडण सुरू असतांनाच मुलाचा राग अनावर झाला आणि घरात ठेवलेली कुऱ्हाड उचलली व वडिलांच्या डोक्यात मारली.यात वडिलांचा जागीच मृत्यू झाला.प्रकरणी मृताची पत्नी इंदू दातारकरने पोलिसांत तक्रार केली.यावरून मुलास अटक करण्यात आली.