देहविक्रीचा पर्दाफाश; महिला अटकेत..!

भंडारा :-बऱ्याच कालावधीपासून सुरू असलेल्या शहरातील देहविक्रिचा पर्दाफाश करण्यात भंडारा जिल्हा अनैतिक मानवी वाहतूक प्रतिबंधक पथकास यश आले आहे.प्रकरणी पीडित महिलांची सुटका करण्यात आली, तर देहव्यापार चालवणाऱ्या महिला आरोपीस अटक करण्यात आली आहे.संगीता विलास धारगावे वय ४० वर्षे,असे अटकेतील आरोपी महिलेचे नाव असून पोलिसांनी घटनास्थळावरून २ हजार ३० रुपयांच्या रोख रकमेसह इतर मुद्देमाल जप्त केला आहे.

अनैतिक मानवी वाहतूक कक्षाला काल शनिवारी भंडारा शहरातील संत ज्ञानेश्वर वॉर्ड,विद्यानगर येथे एका घरामध्ये अवैध देहव्यापार सुरू असल्याची गोपनीय माहिती मिळाली होती.त्यानुसार,पथकाने सर्वप्रथम माहितीची खातरजमा करण्यासाठी एका बनावट ग्राहकाला पाठवले.बनावट ग्राहकाचा इशारा मिळताच पोलिसांनी घरामध्ये छापा टाकला.यावेळी आरोपी महिला संगीता विलास धारगावे ही आपल्या स्वतःच्या राहत्या घरी पीडित महिलांकडून देहव्यापार करून घेत असल्याचे दिसून आले.लागलीच पथकाने झडती करून घटनास्थळावरून रोख रकमेसह इतर मुद्देमाल जप्त केला व आरोपींविरोधात गुन्हा दाखल करण्यात आला. सदरची कारवाई जिल्हा पोलिस अधीक्षक नुरुल हसन, अप्पर पोलिस अधीक्षक नीलेश मोरे यांच्या मार्गदर्शनात स्थानिक गुन्हे शाखेचे पोलिस निरीक्षक नितीन चिंचोळकर,अनैतिक मानवी वाहतूक प्रतिबंधक कक्षाचे प्रभारी अधिकारी सहाय्यक पोलिस निरीक्षक केशव पुंजरवाड,अंकुश गाढवे,अंकोश पुराम,योगेश ढबाले, कौशिक गजभिये तसेच महिला पोलिस अंमलदार अर्चना कुथे,मंजुषा घरडे,मानिक किरसान यांच्या पथकाने केली.