प्रेरणादायी प्रवास..! एकेकाळी रेल्वे स्थानकावर चहा विकणारा आज ‘शास्त्रज्ञ’..

उद्रेक न्युज वृत्त :- ‘जिथे इच्छाशक्ती असते,तिथे मार्ग मिळतोच; विद्यार्थ्यांनी कधीही हार मानू नये’, असा  मोलाचा संदेश देत मातीशी जुळलेली नाळ आजही त्यांच्या हृदयात वसलेली आहे.गोंदिया जिल्ह्याच्या  तिरोडा तालुक्यातील मुंडीकोटा या छोट्याशा गावातील रेल्वे स्थानकावर चहा विकणारा मुलगा आज अमेरिकेतील ‘सिटी युनिव्हर्सिटी ऑफ न्यूयॉर्क’ मध्ये वरिष्ठ वैज्ञानिक आणि प्राध्यापक म्हणून कार्यरत आहे. डॉ.तारेंद्र लाखनकर यांचा हा प्रवास कठोर परिश्रम आणि दृढ इच्छाशक्तीचे जिवंत उदाहरण ठरला आहे. त्यांचे प्राथमिक शिक्षण मुंडीकोटा येथील जिल्हा परिषद शाळा आणि सुभाष विद्यालयात झाले.बालपणी रेल्वे स्थानकावर पालकांच्या चहाच्या टपरीवर मदत करणे आणि तुमसर येथे पिठाची गिरणी चालवत त्यांनी आपले शिक्षण पूर्ण केले. तुमसर येथील राष्ट्रीय विद्यालय आणि एस.एन.मोर महाविद्यालयातून पदवी घेतल्यानंतर,त्यांनी नागपूर(व्हीएनआयटी),नांदेड आणि मुंबई येथून उच्च शिक्षण पूर्ण करून थेट अमेरिकेतील संशोधनाचे क्षेत्र गाठले. संशोधन क्षेत्रात त्यांनी विशेषतः हवामान बदल, अंतरिक्ष विज्ञान,हिमालयीन पर्वतरांगा आणि ‘नासा’च्या महत्त्वपूर्ण प्रकल्पांवर मोलाचे कार्य केले. त्यांच्या या कार्याची दखल घेऊन त्यांना अमेरिकेत ‘प्रेसिडेंट अवॉर्ड’ ने गौरविण्यात आले.जगातील ४० हून अधिक देशांमध्ये विज्ञानाचा प्रसार करणाऱ्या या शास्त्रज्ञाच्या जीवनावर आधारित ‘एका ताऱ्याची झेप’ हे पुस्तक आज जागतिक स्तरावर विद्यार्थ्यांसाठी प्रेरणास्रोत ठरत आहे.महत्वाचे म्हणजे,डॉ.तारेंद्र लाखनकर हे आपल्या व्यस्त दिनचर्येतून वेळ काढून  दरवर्षी आपल्या मूळ गावी मुंडीकोटा येथे येतात. नुकत्याच झालेल्या भेटीत त्यांनी आपल्या गुरुजनांचा सन्मान केला आणि शालेय विद्यार्थ्यांशी संवाद साधला. ‘जिथे इच्छाशक्ती असते,तिथे मार्ग मिळतोचः विद्यार्थ्यांनी कधीही हार मानू नये’, असा मोलाचा संदेश त्यांनी ग्रामीण भागातील मुलांना दिला. मुंडीकोटा ग्रामपंचायतीच्या वतीने सरपंचा प्रतिमा जैतवार आणि उपसरपंच देवेंद्र मंडपे यांनी त्यांचा गौरव केला.याप्रसंगी आयोजित सोहळ्यात एमआयटी इंजिनिअरिंग कॉलेजचे प्राचार्य प्रल्हाद हरडे आणि ग्रीन हेरिटेज सोशल फाउंडेशनचे अध्यक्ष मो.सईद शेख यांनी त्यांच्या संघर्षावर प्रकाश टाकला.